काठमाडौं – भेनेजुएलाकी उपराष्ट्रपति डेल्सी रोड्रिगेजले कार्यकारी राष्ट्रपतिको जिम्मेवारी पाएकी छन् ।

अमेरिकाले राष्ट्रपति निकोलस मादुरोलाई नियन्त्रणमा लिएर न्यूयोर्क पुर्‍याएपछि उपराष्ट्रपति रोड्रिगेजले कार्यकारी राष्ट्रपतिको जिम्मेवारी पाएकी हुन् ।

रोयटर्सका अनुसार त्यहाँको सर्वोच्च अदालतले प्रशासनिक कामलाई निरन्तरता दिनु आवश्यक भएको भन्दै उपराष्ट्रपतिले कार्यकारी राष्ट्रपतिको जिम्मेवारी सम्हाल्नु उपयुक्त हुने जनाएको थियो ।

शनिबार अमेरिकाले भेनेजुएलामा आक्रमण गरेर राष्ट्रपति निकोलस मादुरोलाई नियन्त्रण लिएको हो । अमेरिकी राष्ट्रपति डोनाल्ड टम्पले अब भेनेजुएलामा अमेरिकाले नै सरकार चलाउने बताएका छन्।

५७ वर्षीया डेल्सी अधिवक्ता हुन् । मादुरो सरकारकी विश्वास पात्र उनलाई अनुभवी राजनीतिज्ञको रुपमा चिन्छन्। उनीसँग सञ्चार, विदेशमन्त्रीको भएको अनुभव छ ।

सन् २०१८ मा उनी त्यहाँको उपराष्ट्रपति नियुक्त भएकी हुन् । एक वर्ष अगाडि मात्र उनलाई तेल मन्त्रालयको जिम्मेवारीसमेत दिइएको थियो । अमेरिकाले मादुरोलाई नियन्त्रणमा लिएपछि अमेरिकी हस्तक्षेपको उनले कडा शब्दमा विरोध गरेकी छन्।

डेल्सी रोड्रिगेज वामपन्थी गुरिल्ला लडाकूकी छोरी हुन् । उनका बुवा जर्ज एन्टोनियो रोड्रिगेज भेनेजुएलाका वामपन्थी गुरिल्ला लडाकू थिए। उनले बुवाको योगदानकै आधारमा राजनीतिमा होमिने अवसर पाएकी थिइन्।