काठमाडौं– बलिउड अभिनेता सलमान खानका फ्यानले लामो समयदेखि प्रतीक्षा गरिरहेको फिल्म ‘मातृभूमि’ अब प्रदर्शनको नजिक पुगेको छ । भारत–चीनबीचको गलवान द्वन्द्वमा आधारित यो फिल्मले महत्त्वपूर्ण सरकारी स्वीकृति पाएपछि यसको रिलिजको बाटो खुलेको हो ।

निर्देशक अपूर्व लाखियाको फिल्म यसअघि ‘ब्याटल अफ गलवान’ नाममा घोषणा गरिएको थियो । सन् २०२० मा भारत र चीनका सैनिकबीच भएको गलवान घटनालाई कथाको आधार बनाइएको फिल्ममा चीनको प्रस्तुतिलाई लिएर सरकारी तहमा चासो देखिएपछि यसको प्रदर्शन रोकिएको थियो ।

तर पछिल्लो समय भारत र चीनबीचको सम्बन्धमा सुधार आएपछि निर्माण पक्षले फिल्मको कथावस्तु र प्रस्तुतीकरणमा आवश्यक परिमार्जन गरेको बताइएको छ । परिमार्जित नयाँ संस्करणबाट अधिकारीहरू सन्तुष्ट भएपछि भारतको सूचना तथा प्रसारण मन्त्रालयले फिल्मलाई नो अब्जेक्सन सर्टिफिकेट (एनओसी) दिएको हो ।

एनओसी पाए पनि फिल्मले अझै केन्द्रीय फिल्म प्रमाणीकरण बोर्ड (सीबीएफसी)बाट प्रमाणपत्र लिन बाँकी छ। निर्माण पक्षले छिट्टै सेन्सरमा फिल्म बुझाउने तयारी गरेको छ । यो प्रक्रिया समयमै पूरा भए फिल्मलाई आगामी नोभेम्बर १३ मा प्रदर्शन गर्ने तयारी छ ।

दीपावलीपछिको समयलाई लक्षित गर्दै सलमानले यो मिति रोजेको बताइएको छ । उत्सवको माहौलमा दर्शकको ठूलो उपस्थिति हुने अपेक्षा निर्माण पक्षको छ ।

‘मातृभूमि’मा सलमानसँगै चित्रांगदा सिंह मुख्य भूमिकामा छन् भने नेपाली अभिनेता अनुपविक्रम शाहीको पनि महत्त्वपूर्ण अभिनय रहेको छ ।

सबैभन्दा चासोको विषय भनेको पुरानो संस्करणभन्दा नयाँ ‘मातृभूमि’ कति फरक बनेको छ भन्ने हो । सरकारी निर्देशनपछि फिल्ममा ठूलो परिवर्तन गरिएको र भारत–चीन सम्बन्धको सकारात्मक पक्षलाई समेत समेटिएको बताइएकाले यसको अन्तिम स्वरूप दर्शकमाझ कस्तो देखिन्छ भन्ने प्रतीक्षा झनै बढेको छ ।