काठमाडौँ – राष्ट्रिय स्वतन्त्र पार्टी (रास्वपा) का सभापति रवि लामिछानेले नेपाली कांग्रेसको नयाँ नेतृत्वलाई पूर्वसभापति शेरबहादुर देउवाको अलमलबाट मुक्त भई अघि बढ्न सुझाव दिएका छन्।

नेपाली कांग्रेसको १५औँ महाधिवेशनको उद्घाटन समारोहलाई सम्बोधन गर्दै सभापति लामिछानेले कांग्रेसको नयाँ नेतृत्वलाई पार्टी रूपान्तरणका लागि स्पष्ट अडान लिन आग्रह गरे।

“शेरबहादुर देउवालाई फकाउनुभन्दा छोडिदिँदा नै राम्रो हुन्छ, म कांग्रेसका साथीहरूलाई यो सुझाव दिन चाहन्छु,” लामिछानेले भने।

सम्बोधनका क्रममा लामिछानेले कांग्रेसको लामो र गौरवशाली राजनीतिक इतिहासको कदर गर्दै अब पुराना शैली र नेतृत्वको दबाबबाट मुक्त भएर नयाँ पुस्ता एवम्‌ बदलिएको राजनीतिक परिस्थितिअनुरूप अघि बढ्नुपर्ने बताए। कांग्रेसको इतिहास नै उसको ठूलो सामर्थ्य भएकाले त्यसैको जगमा टेकेर भविष्यको नयाँ यात्रा तय गर्नुपर्ने धारणा उनले राखे।