काठमाडौँ । भोटेकोसी नदीमा तत्काल ठूलो बाढी आउने सम्भावना नदेखिएको बाढी पूर्वानुमान महाशाखाले जनाएको छ।

जल विज्ञान तथा जलस्रोत अनुसन्धान केन्द्र अन्तर्गतको बाढी पूर्वानुमान महाशाखाले शुक्रबार राति सूचना प्रकाशित गरी तत्काल बाढी आउने सम्भावना नदेखिएको जनाएको हो। चिनियाँ समकक्षी निकायहरूले उपलब्ध गराएको सूचनाअनुसार, बाढीको सम्भावना नरहेको महाशाखाले उल्लेख गरेको छ।

‘यस केन्द्र चिनियाँ समकक्षी निकायहरूसँग नियमित सम्पर्कमा रही प्राप्त सूचनाहरूको निरन्तर अनुगमन गरिरहेको छ,’ महाशाखाले भनको छ, ‘हालसम्म प्राप्त सूचनाका आधारमा तत्काल ठूलो बाढी आउन सक्ने सम्भावना देखिएको छैन।’

चीनको जलस्रोत मन्त्रालयअन्तर्गतको चाइना मेटियोरोलोजिकल एडमिनिस्ट्रेसनले नेपालको जल तथा मौसम विज्ञान विभागलाई हिमतालको जोखिमसँगै मौसम सम्बन्धी जानकारी दिँदै आएको छ।

त्यसका आधारमा महाशाखाले तत्काल ठूलो बाढी नआउने जनाएको हो। अहिले हल्लाको पछि लागेर नआत्तिन पनि महाशाखाले अनुरोध गरेको छ।

‘पुष्टि नभएका सूचना तथा हल्लाको आधारमा नआत्तिनुहुन तथा संयमित रहनुहुन अनुरोध गर्दछौँ,’ महाशाखाले भनेको छ, ‘साथै, बाढीको सम्भावना देखिएमा यस केन्द्रबाट एसएमएस मार्फत पूर्वसूचना सम्प्रेषण गरिनेछ।’