काठमाडौं- पाकिस्तानलाई आधार बनाएर अनलाइन ठगी गर्ने गिरोहले विश्वभरका नागरिकहरूलाई निशाना बनाइरहेको एक अनुसन्धानले खुलासा गरेको छ । संघीय अनुसन्धान एजेन्सी (एफआइए) ले हालै अनलाइन ठगी र अन्य अवैध गतिविधिविरूद्ध चलाएको वृहद कारवाहीका क्रममा सयौँ विदेशी नागरिकहरू पक्राउ परेपछि यो रहस्य खुल्न आएको हो ।

अनुसन्धान अधिकारीहरूका अनुसार पक्राउ परेका विदेशीहरूलाई सबै कानुनी प्रक्रिया तथा कागजातको पालना गर्दै १५ दिनभित्र पाकिस्तान छाड्न निर्देशन दिइएको छ । यस प्रकरणमा पाकिस्तान टेलिकम्युनिकेसन अथोरिटी (पिटिए), संघीय राजस्व बोर्ड (एफबिआर) र सेक्युरिटीज एण्ड एक्सचेन्ज कमिसन अफ पाकिस्तान (एसइसीपी) लाई समेत अनुसन्धानको दायरामा तानिएको छ ।

साथै, विदेशी नागरिकहरूको प्रवेश, बसाइ, व्यापारिक गतिविधि र उनीहरूको साइबर नेटवर्क पत्ता लगाउन आप्रवासन तथा राहदानी अधिकारीहरूसँग पनि विस्तृत विवरण माग गरिएको छ। अनुसन्धानका क्रममा केही रोचक र गम्भीर तथ्यहरू बाहिर आएका छन्।

तीन महिनाअघि शेफको रूपमा पाकिस्तान आएका एक इन्डोनेसियाली ठगले आफ्नो गिरोहबारे खुलासा गर्दै चिनियाँ र इन्डोनेसियाली नागरिकसहितको ९ जनाको समूहले विभिन्न योजनामार्फत इन्डोनेसियाका ४० वर्षभन्दा बढी उमेरका महिलाहरूलाई निशाना बनाएर मासिक ८० हजार डलरसम्म कमाउने गरेको बताएका छन् । पाकिस्तानमै बसेर विदेशमा रहेका व्यक्तिहरूलाई ठगी गर्ने जाल फैलिएको पाइएपछि अनुसन्धानलाई देशबाहिरका पीडित र नेटवर्कका अन्य सदस्यहरूसम्मै विस्तार गरिएको छ।

यसैबीच, यस किसिमका अवैध कल सेन्टर, साइबर धोखाधडी र अवाञ्छित गतिविधिहरूलाई निमिट्यान्न पार्न संघीय सरकारले देशव्यापी रूपमा ठूलो कारबाही चलाउने निर्णय गरेको छ। एफआइए मुख्यालयको प्रत्यक्ष निगरानीमा विशेष कार्यदल गठन गरिएको छ भने कल सेन्टरहरूमाथि गरिने कारबाहीको दैनिक प्रतिवेदन गृह मन्त्रालयमा बुझाउनुपर्ने व्यवस्था गरिएको छ।

उक्त कार्यदलले फिरौती, ब्याकमेलिङ, जुवा र विभिन्न प्रलोभनका स्क्यामहरूको अनुसन्धान गर्नेछ। यसअन्तर्गत कराँचीलगायतका प्रमुख सहरहरूमा सञ्चालित शंकास्पद कल सेन्टरहरूको सूचीसमेत तयार पारिसकिएको छ।