काठमाडौं । फुटबलर्स मिसन टुगेदरले अखिल नेपाल फुटबल संघ (एन्फा)लाई विश्व फुटबलको सर्वोच्च निकाय फिफाले गरेको निलम्बन फुकुवाका लागि मध्यस्तकर्ताको भूमिका निर्वाह गर्न तयार रहेको बताएको छ ।

पूर्वखेलाडी, प्रशिक्षक, रेफ्री र अन्य फुटबल अधिकारीहरूको संस्था मिसन टुगेदरले नेपाली फुटबल निकासका लागि मध्यस्तकर्ताको भूमिका निर्वाह गर्न तयार रहेको बताउँदै फिफा अध्यक्ष जियानी इन्फान्टिनोलाई पत्र लेखेको हो ।

मिसन टुगेदरका अध्यक्ष भिक्टर जबराले पत्रमार्फत फिफाको निलम्बनले पूरा नेपाल स्तब्ध भएको उल्लेख गरेका छन् । समस्या समाधान गर्न नयाँ प्रजातान्त्रिक र पारदर्शी चुनावका लागि नयाँ तदर्थ समिति बनाउनुपर्ने विचार राखेका छन् ।

एन्फामाथि सरकारी हस्तक्षेप भएको भन्दै फिफाले गएको असार ११ गते एन्फालाई निलम्बन गरेको थियो ।

निलम्बनका कारण नेपालले एएफसी यू–१७ महिला एसियन कप र एएफसी यू–२० एसियन कप छनोट गुमाइसकेको छ । यसैगरी, नेपाल एपीएफ क्लबले एएफसी महिला च्याम्पियन्स लिग खेल्न नपाउने भएको छ ।

यहीकारण दक्षिण एसियाली फुटबल महासंघ ( साफ) च्याम्पियनसिप गुमाउने सम्भावना बढेपछि भने सर्वजनिक रूपमा एन्फामाथिको निलम्बन फुकुवा गरी नेपाली फुटबललाई चलायमान बनाउनुपर्ने मागहरू उठ्न थालेका छन् ।