काठमाडौं– त्रिचन्द्र कलेजका विद्यार्थीले सरकारले बनाएको वातावरण संरक्षण ऐन, २०७६ लाई संशोधन गर्न बनाएको विधेयकका केही मस्यौदामा ध्यानाकर्षण भएको जनाएका छन् । 

मंगलबार प्ले कार्ड सहित प्रदर्शन गर्दै इको क्लब त्रिचन्द्रका विद्यार्थीले ‘वातावरण संरक्षण ऐन, २०७६ लाई संशोधन गर्न बनेको विधेयक’को मस्यौदामा उल्लेख भएको ‘वातावरण निरीक्षक’ र ‘वातावरण परीक्षक’को योग्यतासम्बन्धी व्यवस्थामा ध्यानाकर्षण गराएका हुन् ।

सामाजिक सञ्जालमा सार्वजनिक मस्यौदामा ‘वातावरण निरीक्षक’ र ‘वातावरण परीक्षक’ को योग्यतासम्बन्धी प्रस्तावित व्यवस्थाले वातावरण विषयबाहेक अन्य विविध विषयमा स्नातक गरेका व्यक्तिलाई समेत योग्य मान्ने व्यवस्था समावेश भएको देखिएको उनीहरूको भनाइ छ ।

सोही व्यवस्था आधिकारिक मस्यौदामा रहेको पुष्टि भएमा यो वातावरण निरीक्षण तथा वातावरण परीक्षण जस्ता विशिष्टीकृत प्राविधिक जिम्मेवारीहरूको मर्म, वातावरण पेशाको व्यावसायिक मान्यता तथा वातावरण विज्ञान, वातावरण इन्जिनियरिङ, वातावरण व्यवस्थापन लगायत वातावरण विषयमा अध्ययन गरेका हजारौँ दक्ष जनशक्तिको भूमिका र योगदानलाई कमजोर बनाउने गम्भीर विषय हुने उनीहरूको बताएका छन् ।