काठमाडौं- प्रतिपक्षी नेपाली कम्युनिष्ट पार्टी (नेकपा) सांसद रमेशकुमार मल्लले राहदानी विभागमा कयौँ दिनदेखि सेवाग्राहीको लाइनबारेमा वालेन्द्र शाह नेतृत्वको सरकारलाई व्यंग्य कसेका छन् ।

मंगलबार प्रतिनिधिसभाको बैठकमा उनले सरकारप्रति कडा प्रहार गरेका हुन्। ‘नागरिकका घरघरमै पासपोर्ट पुर्‍याउने’ सरकारको घोषणाविपरीत सेवाग्राहीको लामो लाइन देखिएको भन्दै उनले व्यंग्य गरे।

मल्लले उस्तै लाइन यातायातसहित अन्य सरकारी कार्यालयमा पनि देखिएको बताए । ‘सरकार पासपोर्ट घरसम्मै पुर्‍याउँछु भन्दै थियो, तर पासपोर्ट लिनेको लाइन घरैसम्म पुगको रहेछ’, मल्लले भने, ‘ त्यस्तै लाइन सरकारी सेवाप्रदायक अन्य कार्यालयमा लागेको छ ।’

मल्लले उपभोक्ताले खाना पकाउने एलपी ग्यास र किसानले रासायनिक मल नपाएको विषय पनि उठाए । ‘उपभोक्तालाई खाना पकाउने ग्यास र किसानलाई मलको अभाव कायमै छ । महंगीका कारण नागरिक सास्ती व्यहोरिरहेका छन्’, उनले भने ।

सरकारले चिकित्सा शिक्षा आयोगका पदाधिकारी बर्खास्त गरेर नयाँ नियुक्ति नगर्दा समयदेखि चिकित्सा शिक्षाको प्रवेश परीक्षामा ढिलाइ भएको भन्दै आपत्ति जनाए । उनले आयोगमा तत्काल रिक्त निर्देशकहरू नियुक्त गरी परीक्षाको वातावरण बनाउन सरकारलाई भने ।