काठमाडौं– बलिउडका ‘मिस्टर परफेक्सनिस्ट’ आमिर खानले आफ्नो तेस्रो विवाहको तयारीबारे पहिलोपटक सार्वजनिक रूपमा पुष्टि गरेका छन् । भारतीय सञ्चारमाध्यमका अनुसार आमिरले जुलाई ५ मा आफ्नी प्रेमिका गौरी स्प्रैटसँग विवाह गर्नेछन् ।

मुम्बईमा आयोजित एक कार्यक्रममा सञ्चारकर्मीसँग कुरा गर्दै आमिरले विवाह भव्य नभई अत्यन्त निजी हुने बताए । उनका अनुसार विवाह समारोह आफ्नै निवासमा आयोजना हुनेछ, जहाँ दुवै परिवारका सदस्य र केही नजिकका साथीभाइ मात्र उपस्थित रहनेछन् । कार्यक्रममा उनका छोरा जुनैद खान पनि सहभागी थिए ।

गौरी स्प्रैट बेंगलुरुकी फेसन तथा सैलुन व्यवसायी हुन् । उनका पिता तमिल–ब्रिटिश मूलका हुन् भने आमा पञ्जाबी–आइरिस मूलकी हुन् । उनी ब्रिटिश कम्युनिस्ट तथा भारतको स्वतन्त्रता आन्दोलनसँग जोडिएका फिलिप स्प्रैटकी नातिनी पनि हुन् ।

आमिरले सन् २०२५ मा आफ्नो ६०औँ जन्मदिनका अवसरमा गौरीसँगको सम्बन्ध सार्वजनिक गरेका थिए। गौरीको यसअघि विवाह भइसकेको छ र उनको सात वर्षको एक सन्तान छ । पछिल्ला दुई वर्षदेखि उनी आफ्ना सन्तानसँग मुम्बईमा बस्दै आएकी छन् ।

रोचक कुरा के छ भने आमिर र गौरीको चिनजान आजको होइन । उनीहरू करिब २५ वर्षदेखि एक अर्कालाई चिन्दै आएका छन् । वर्षौंसम्मको मित्रता बिस्तारै प्रेममा बदलिएको र अब विवाहमा परिणत हुन लागेको हो ।

दुई दशकभन्दा लामो मित्रतापछि जीवनको नयाँ अध्याय सुरु गर्न लागेका आमिर र गौरीको विवाह अहिले बलिउडका सबैभन्दा चर्चित विषयमध्ये एक बनेको छ ।