काठमाडौं- प्रधानमन्त्री वालेन्द्र शाहको अध्यक्षतामा आज संवैधानिक परिषद्को बैठक बस्दैछ। प्रधानमन्त्री तथा मन्त्रिपरिषद् कार्यालयमा अपराह्न ५ बजेका लागि बैठक बोलाइएको हो।

प्रमुख प्रतिपक्ष दल नेपाली कांग्रेसका नेता भीष्मराज आङ्देम्बेका अनुसार बैठकमा विभिन्न संवैधानिक निकायका रिक्त पदमा नियुक्तिका लागि नाम सिफारिस गर्ने विषयमा छलफल हुने कार्यसूची रहेको छ।

हाल विभिन्न संवैधानिक निकायमा दर्जनभन्दा बढी पद रिक्त छन्। निर्वाचन आयोगमा अध्यक्षसहित दुई, राष्ट्रिय मानव अधिकार आयोगमा एक सदस्य, मुस्लिम आयोगमा अध्यक्षसहित दुई तथा राष्ट्रिय समावेशी आयोगमा अध्यक्षसहित दुई पद खाली छन्।

यस्तै, अख्तियार दुरुपयोग अनुसन्धान आयोगमा एक सदस्य, थारू आयोगमा अध्यक्षसहित दुई, मधेसी आयोगमा अध्यक्षसहित दुई, राष्ट्रिय प्राकृतिक स्रोत तथा वित्त आयोगमा अध्यक्षसहित तीन र राष्ट्रिय महिला आयोगमा एक सदस्य पद रिक्त रहेको छ।

संवैधानिक व्यवस्थाअनुसार संवैधानिक परिषद्ले यी रिक्त पदका लागि योग्य व्यक्तिको नाम छनोट गरी संसदीय सुनुवाइका लागि सिफारिस गर्ने व्यवस्था रहेको छ। बैठकबाट रिक्त पदपूर्तिको प्रक्रिया अघि बढ्ने अपेक्षा गरिएको छ।