काभ्रेपलाञ्चोक– शिक्षा तथा खेलकुदमन्त्री सस्मित पोखरेलले सरकारले नेपालमै गुणस्तरीय शिक्षा उपलब्ध गराउने लक्ष्यका साथ काम गरिरहेको बताएका छन् ।

काठमाडौँ विश्वविद्यालय (केयू) को धुलिखेलस्थित ३१औँ दीक्षान्त समारोहलाई सम्बोधन गर्दै मन्त्री पोखरेलले समृद्ध र समुन्नत समाज निर्माणका लागि शिक्षित युवाको सक्रिय भूमिका अपरिहार्य रहेको बताए ।

‘सरकारले नेपालमै गुणस्तरीय शिक्षा उपलब्ध गराउने लक्ष्यका साथ काम गरिरहेको छ। यसका लागि शिक्षित युवाको सक्रिय भूमिका आवश्यक छ,’ उनले भने।

नयाँ पुस्ताले परिकल्पना गरेको समुन्नत समाज निर्माणका लागि सरकार प्रयासरत रहेको उल्लेख गर्दै उनले युवालाई राष्ट्र निर्माणमा सक्रिय सहभागी बन्न आग्रह गरे। काठमाडौँ विश्वविद्यालयबाट हालसम्म ५१ हजारभन्दा बढी दक्ष जनशक्ति उत्पादन भइसकेको उल्लेख गर्दै उनले उनीहरूको ज्ञान, सीप र अनुभव देशको विकासमा उपयोग हुने विश्वास व्यक्त गरे।

दीक्षित विद्यार्थीलाई विदेशतर्फ आकर्षित हुनुभन्दा नेपालमै अवसर खोज्न र सिर्जना गर्न आग्रह गर्दै मन्त्री पोखरेलले भने, ‘नेपालमै अवसर पाइन्छ, हामी आफैँ पनि थप अवसर सिर्जना गर्नेछौँ।’

समारोहमा मन्त्री पोखरेलले विभिन्न विधामा उपाधि हासिल गरेका विद्यार्थीलाई शैक्षिक प्रमाणपत्रसमेत प्रदान गरेका थिए।

कार्यक्रममा काठमाडौँ विश्वविद्यालयका उपकुलपति प्रा। डा। ऋषिकेश वाग्लेले कृत्रिम बुद्धिमत्ता (एआई) र अटोमेशनको तीव्र विकाससँगै प्राविधिक दक्षतासँगै विवेक, नैतिकता, सांस्कृतिक चेतना र राष्ट्रप्रतिको जिम्मेवारीलाई समान महत्व दिनुपर्नेमा जोड दिए।

त्यसैगरी, भारतस्थित डेक्कन कलेज पोस्ट–ग्राजुएट एन्ड रिसर्च इन्स्टिच्युटका कुलपति प्रा। डा। भूपेन्द्र पाटद्र्धनले नेपाल–भारतबीच शिक्षा, अनुसन्धान तथा परम्परागत ज्ञानको आदानप्रदानलाई थप सुदृढ बनाउनुपर्ने आवश्यकता औँल्याउँदै विश्वविद्यालयबाट प्राप्त शिक्षालाई समाजको हित, नैतिकता र जिम्मेवारीका साथ प्रयोग गर्न आग्रह गरे।