काठमाडौं– पछिल्लो २४ घण्टामा देशभर भएका विभिन्न विपद्का घटनामा एक जनाको मृत्यु, एक जना बेपत्ता तथा ६ जना घाइते भएका छन् । 

राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार यो अवधिमा १८ वटा विपद्का घटना दर्ता भएका छन् । सोलुखुम्बुको सोलुदूधकुण्ड नगरपालिका–१ फुलेलीमा भैँसीले लछार्दा ६३ वर्षीय एक पुरुषको मृत्यु भएको छ । 

यस्तै, सगरमाथा आरोहणका क्रममा खराब मौसमका कारण बाटो हराएका पोल्याण्डका एक नागरिक बेपत्ता भएका छन् र उनको खोजी कार्य जारी रहेको छ ।

विभिन्न जिल्लामा आगलागीका ८ वटा घटना भएका छन् । पाँचथर, सुनसरी, उदयपुर, धनुषा, सिरहा, बारा, नवलपरासी (पूर्व) र दाङमा भएका आगलागीबाट घर, गोठ, मकैबाली, प्लास्टिकका बोरा तथा अन्य सामग्री जलेर करिब ९ लाख ४३ हजार रुपैयाँ बराबरको क्षति भएको प्राधिकरणले जनाएको छ ।

यस अवधिमा डोल्पामा भ्रमणमा गएका एक अमेरिकी नागरिक लेक लागेर बिरामी परेका छन् भने रुकुम पूर्वमा चट्याङ लाग्दा एक महिला घाइते भएकी छन् । पर्सा र अछाममा सर्पदंशका दुई घटना भएका छन्, जसमा दुई बालिका घाइते भएका छन् ।

त्यस्तै, उदयपुरमा बाँदरको आक्रमणबाट एक पुरुष घाइते भएका छन् भने बर्दियामा चितुवाको आक्रमणबाट बच्न खोज्दा भैँसीले कुल्चिएर अर्का एक पुरुष घाइते भएका छन् । मोरङमा जंगली हात्तीले चिया–नास्ता पसलमा क्षति पुर्‍याएको विवरण पनि प्राधिकरणले सार्वजनिक गरेको छ ।

प्राधिकरणका अनुसार विपद्का अधिकांश घटनामा नेपाल प्रहरी, दमकल तथा स्थानीयवासीको सहयोगमा उद्धार तथा नियन्त्रणका काम सम्पन्न गरिएको छ ।