काठमाडौं– विशेष अदालतले घुस तथा कमिशन लिएको ठहर भएका मधेश प्रदेशका प्रदेशसभा सदस्य सरोजकुमार सिंहलाई ४ वर्ष १ महिना कैद सजाय सुनाएको छ।

विशेष अदालतका अध्यक्ष सुदर्शनदेव भट्ट तथा सदस्यद्वय उमेश कोइराला र विदुर कोइरालाको इजलासले यसअघि सिंहलाई भ्रष्टाचार निवारण ऐन, २०५९ अन्तर्गतको कसुरमा दोषी ठहर गरेको हो। 

सोही मुद्दामा सजाय निर्धारण गर्दै अदालतले ४ वर्ष कैद र ३८ लाख ५० हजार १३९ रुपैयाँ जरिवाना गर्ने फैसला गरेको हो।

अदालतका अनुसार सिंहले विभिन्न उपभोक्ता समितिहरूबाट घुस तथा कमिशनबापत प्राप्त गरेको ३८ लाख ५० हजार १३९ रुपैयाँलाई भ्रष्टाचारको बिगो कायम गरिएको छ। 

उक्त रकम बराबरको जरिवाना तोकिएको छ भने सोही रकम जफत हुने आदेश पनि गरिएको छ।

वारदातका बेला सिंह महोत्तरी निर्वाचन क्षेत्र नं. ४ (ख) बाट निर्वाचित मधेश प्रदेशसभा सदस्य रहेकाले भ्रष्टाचार निवारण ऐनको दफा २४ अनुसार थप सजायसमेत निर्धारण गरिएको अदालतले जनाएको छ।

त्यो व्यवस्थाअनुसार उनलाई थप १ महिना कैद सजाय सुनाइएको छ। अदालतले सिंहबाट जरिवानाको आधारमा १ लाख ५४ हजार ५ रुपैयाँ ५६ पैसा क्षतिपूर्ति शुल्कसमेत असुल गरी पीडित राहत कोषमा जम्मा गर्न आदेश दिएको छ।

अख्तियार दुरुपयोग अनुसन्धान आयोगले सिंहविरुद्ध विभिन्न उपभोक्ता समितिहरूबाट कमिशन लिएको आरोपमा भ्रष्टाचार मुद्दा दायर गरेको थियो। विशेष अदालतले आयोगको दाबी पुष्टि गर्दै दोषी ठहर गरेको हो।