दोलखा– जिल्लामा वन क्षेत्र अतिक्रमण गरेर निर्माण गरिएका भौतिक संरचना हटाउने अभियान अब जिल्लाको शैलुङ कालापानी क्षेत्रबाट सुरु हुने भएको छ । 

डिभिजन वन कार्यालय दोलखाले अदालतको आदेश आउने बित्तिकै अतिक्रमित क्षेत्रमा डोजर चलाएर संरचना हटाउने तयारी पूरा भएको जनाएको छ ।

नेपाल पत्रकार महासंघ दोलखाले बुधबार चरिकोटमा आयोजना गरेको वन तथा वातावरणसम्बन्धी अन्तरक्रिया कार्यक्रममा डिभिजन वन कार्यालय दोलखाका प्रमुख अनिल रेग्मीले वन क्षेत्रको अतिक्रमण हटाउने कार्य अब ढिलाइ नगरी अघि बढाइने बताएका हुन् ।

कालापानीमा अदालतको आदेश पर्खाइ

कार्यक्रममा बोल्दै प्रमुख रेग्मीले शैलुङ गाउँपालिकाको कालापानी क्षेत्रमा भएको वन अतिक्रमण सम्बन्धी मुद्दामा अदालतले केही दिनभित्रै फैसला दिने अपेक्षा गरिएको बताए । 

अदालतबाट आदेश प्राप्त हुने बित्तिकै अतिक्रमित संरचना हटाउन डोजर परिचालन गरिने उनको भनाइ थियो ।

‘कालापानीबाट अतिक्रमण हटाउने अभियान सुरु हुनेछ । अदालतको आदेश आए लगत्तै कार्यान्वयनमा जान्छौँ,’ उनले भने ।

संस्थागत अतिक्रमण बढी

डिभिजन वन कार्यालयले सार्वजनिक गरेको तथ्यांकअनुसार दोलखाका दुई नगरपालिका र सात गाउँपालिकामा गरी ४४ दशमलव ८४ हेक्टर सार्वजनिक जग्गा अतिक्रमण भएको छ ।

त्यसमध्ये ५ दशमलव ५८ हेक्टर व्यक्तिगत र ३९ दशमलव २६ हेक्टर संस्थागत रूपमा अतिक्रमण भएको तथ्यांकले देखाएको छ। जिल्लामा व्यक्तिगत प्रयोजनभन्दा संस्थागत रूपमा वन क्षेत्र अतिक्रमण बढी भएको प्रमुख रेग्मीले जानकारी दिए ।

वन संरक्षणमा पत्रकारको चासो 

नेपाल पत्रकार महासंघ दोलखाका अध्यक्ष प्रभु जिरेलको अध्यक्षतामा सम्पन्न कार्यक्रममा जिल्लाका सञ्चारकर्मीहरूले वन संरक्षण, वातावरणीय सन्तुलन, वन अतिक्रमण नियन्त्रण तथा सार्वजनिक जग्गा संरक्षणका विषयमा जिज्ञासा राखेका थिए ।

कार्यक्रममा वन तथा वातावरण संरक्षणका लागि सरकारी निकाय, स्थानीय तह, सञ्चारमाध्यम र समुदायबीच समन्वय आवश्यक रहेकोमा जोड दिइएको थियो । 

पछिल्ला दिनमा सार्वजनिक तथा वन क्षेत्र फिर्ता गराउने विषयमा जिल्लाभर बहस चलिरहेका बेला डिभिजन वन कार्यालयले अतिक्रमण हटाउने अभियान तीव्र बनाउने संकेत दिएको छ । सुवाश बस्नेत/दोलखा