काठमाडौं- आगामी निर्वाचनका लागि धरान उपमहानगरपालिकाको मेयरको उम्मेदवारीलाई लिएर विवाद चर्किएपछि हर्कराज साम्पाङ नेतृत्वको श्रम संस्कृति पार्टीमा आन्तरिक असन्तुष्टि देखिएको छ ।

पार्टीका केन्द्रीय सदस्य पूर्ण गहतराज विश्वकर्मासहित पाँच जनाले सामूहिक राजीनामा दिएपछि उनीहरूलाई अध्यक्ष साम्पाङ्गले बुधबार दिउँसो निष्काशन गरेका छन् ।

साम्पाङ्गले सामाजिक सञ्जालमा लेख्दै केन्द्रीय सदस्य गहतराज र प्रदेश सदस्य राखी मेवाहाङलाई पार्टीबाट हटाइएको जानकारी दिएका हुन् । यसअघि गहतराजसहित पाँच नेताले विज्ञप्ति जारी गर्दै पार्टी परित्याग गरेका थिए ।

राजीनामा दिने समूहमा प्रदेश सदस्य विष्णुकुमारी राई, निनाचन्द्र राई, नरहरि राई र अटलसिंग राई पनि रहेका छन् ।

उनीहरूले अध्यक्ष साम्पाङ्गले आफूहरूलाई धरानको मेयर उम्मेदवार बनाउने आश्वासन दिएर पार्टीमा भित्र्याए पनि उक्त प्रतिबद्धताविपरीत अर्को व्यक्तिलाई उम्मेदवार घोषणा गरेको आरोप लगाएका छन् ।

गहतराज समूहले गत वैशाख १५ गते पार्टी प्रवेश गर्दा मेयर उम्मेदवारीबारे सहमति भएको दाबी गरेका हुन् । तर पछि धनबहादुर राईलाई उम्मेदवार घोषणा गरिएकोमा असन्तुष्टि जनाउँदै पार्टी छोडेको जनाएका छन् । उनीहरूले आफूहरूलाई धोका दिइएको उल्लेख गरेका छन् ।

यसैबीच, गहतराजले सामाजिक सञ्जालमा भावनात्मक स्ट्याटस लेख्दै साम्पाङ्गसँगको सम्बन्ध टुटेको संकेत गरेका छन् । उनले आफूहरूलाई ‘नदीका दुई किनारा’ भन्दै सहकार्य अब सम्भव नरहेको टिप्पणी गरेका छन् ।

उक्त विवादसँगै धरानको मेयर उम्मेदवारका रूपमा अघि सारिएका धनबहादुर राई २०७९ को स्थानीय निर्वाचनमा नेकपा एमालेबाट वडा नम्बर ४ का वडाध्यक्ष निर्वाचित भएका थिए । पछि उनले पदबाट राजीनामा दिएर श्रम संस्कृति पार्टीमा प्रवेश गरेका हुन् ।