काठमाडौं– नागढुंगा सुरुङमार्ग निर्माण आयोजना सम्पन्न गर्न जापान सरकारले थप ऋण सहायता उपलब्ध गराउने भएको छ।

जापानले ५ अर्ब ७० करोड जापानी येन (करिब ५ अर्ब ५० करोड रुपैयाँ) थप ऋण प्रदान गर्ने भएको हो। यस सम्बन्धी समझदारीपत्रमा बुधबार नेपाल सरकारका अर्थ सचिव घनश्याम उपाध्याय र नेपालका लागि जापानी राजदूत माएडा तोरुले हस्ताक्षर गरेका छन्।

नेपालस्थित जापानी दूतावासका अनुसार थप ऋण सहायता स्वीकृत भएसँगै उक्त आयोजनाका लागि जापानको कुल ऋण सहयोग २२ अर्ब ३३ करोड ६० लाख येन पुगेको छ।

यसअघि सन् २०१६ को डिसेम्बरमा जापानले आयोजनाका लागि १६ अर्ब ६३ करोड ६० लाख येन ऋण सहायता उपलब्ध गराएको थियो।

निर्माण कार्यमा भएको ढिलाइ, निर्माण सामग्री तथा सेवाको मूल्यवृद्धि र विभिन्न प्राविधिक कारणले आयोजनाको लागत बढेपछि थप बजेट आवश्यक परेको थियो। सोही आवश्यकतालाई सम्बोधन गर्न जापानले अतिरिक्त ऋण सहायता उपलब्ध गराएको हो।

सन् २०१९ देखि निर्माण सुरु भएको नागढुंगा सुरुङमार्ग आगामी साउनदेखि सञ्चालनमा ल्याउने तयारी गरिएको छ।

साढे पाँच वर्षपछि नागढुंगा सुरुङमार्ग खुल्दै, ७ मिनेटमै धादिङ-काठमाडौँ यात्रा