काठमाडौं- राष्ट्रिय स्वतन्त्र पार्टीका सभापति रवि लामिछानेले सरकारले सबैजना सुकुम्वासीलाई असुरक्षित नबनाउने दाबी गरेका छन्।

उनले सुकुम्बासीलाई अहिले त्रसित बनाउने काम भइरहेको बताउँदै सरकारको तर्फबाट सुरक्षित ठाउँमा पुर्‍याउने कामको दायित्व आफूहरूको भएको बताए ।

‘देशैभरिका सुकुम्वासी साथीहरूलाई विनम्रताका साथ फेरि पनि म यो सन्देश दिन्छु। जुन तरिकाले तपाईंहरूलाई आतंकित पारेर आज नै उठाउँछ, भोलि नै उठाउँछ भोलि नै उठाउँछ भनेर आपत् पार्ने काम भएको छ, केन्द्र सरकारले त्यो गरेको छैन’, उनले भने, ‘फेरि पनि भन्छु, असुरक्षित हुनुहुन्छ भने तपाईंलाई सुरक्षित ठाउँमा सार्ने काम केन्द्र सरकारको हो । पार्टीको निर्देशन पनि सरकारलाई त्यही छ। त्योभन्दा बाहिर गएको कुरामा पार्टीले पनि सरकारलाई सचेत गराएको छ।’

तर त्यहीबेला सभापति लामिछानेलाई सुकुम्वासी विद्यार्थीहरूको पढाइमा असर परेको प्रश्न गर्दा भने उनी हतार हतार गाडी चढेर पार्टी कार्यालयबाट बाहिरिए ।