जनकपुरधाम– खाद्य प्रविधि तथा गुण नियन्त्रण कार्यालय जनकपुरधामले तोकेको मापदण्ड तथा खाद्य स्वच्छता कायम गर्ने जनकपुरधामका १२ वटा विभिन्न होटल तथा रेष्टुरेन्टलाई स्तरोन्नतिको प्रमाणपत्र प्रदान गरेको छ ।

साथै ती होटल तथा रेष्टुरेन्टहरूले प्राप्त गरेको स्तरीकरणको प्राप्तांक नम्बर एवं लोगोसहित हरियो स्टिकर प्रदान गरेको कार्यालय प्रमुख विमल दाहालले जानकारी दिए ।

यसरी स्तरोन्नतिको प्रमाणपत्र प्राप्त गर्ने होटलहरूमा मिथिला यात्री निवास जनकपुरधाम–६, होटल सुपा प्रालि जनकपुरधाम–९, जानकी स्टार होटल प्रालि जनकपुरधाम–८, होटल रामा प्रालि जनकपुरधाम–१, होटल अरिपन प्रालि जनकपुरधाम–२, अजन्नी सुइट प्रालि जनकपुरधाम–८, होटल सिटी पार्क जनकपुरधाम–९, होटल मिस्टिक मिथिला प्रालि जनकपुरधाम–२, होटल सीताशरण प्रालि जनकपुरधाम–२३, होटल वेलकम प्रालि जनकपुरधाम–२, मिथिला थाली प्रालि जनकपुरधाम–८ तथा मैथिल थाल प्रालि जनकपुरधाम–७ रहेको कार्यालयले जनाएको छ ।

धनुषाका प्रमुख जिल्ला अधिकारी प्रेमप्रसाद लुइँटेलको नेतृत्वमा सहायक प्रमुख जिल्ला अधिकारी उमेश दाहाल एवं खाद्य प्रविधि तथा गुण नियन्त्रण कार्यालयका प्रमुख विमल दाहाललगायतका पदाधिकारीहरूको टोलीले ती होटललाई स्तरोन्नतिको प्रमाणपत्र प्रदान गरेका थिए। 

साथै ती होटलका रेष्टुरेन्टमा हरियो स्टिकर टाँस गरिएको बताइएको छ । सो टोलीले होटलहरूका रेष्टुरेन्ट तथा भान्सा कोठाहरूको अनुगमन तथा निरीक्षणका साथै सरसफाइबारे जानकारी लिएका थिए ।

खाद्य प्रविधि तथा गुण नियन्त्रण विभागको होटलका रेष्टुरेन्ट स्तरीकरण गर्नेसम्बन्धी निर्देशिका, २०७४ को अनुसूची १ को खाद्य स्वच्छताका आधारमा आवश्यक अनुगमन निरीक्षणपश्चात ती होटलको स्तरीकरण मूल्यांकन गरिएको थियो ।