काठमाडौं– बलात्कार आरोप लागेपछि  कर्णाली फिल्म्स प्रालिले निर्माण गरिरहेको चलचित्र पाँच पाण्डवबाट अभिनेता सागर लम्साल ‘बले’ लाई निष्कासन गरिएको छ । 

अमेरिकामा बस्दै आएकी एक युवतीले सामाजिक सञ्जालमार्फत लम्सालमाथि बलात्कारको आरोप लगाएपछि निर्माण पक्षले आपतकालीन बैठक बसेर उनलाई चलचित्रबाट हटाउने निर्णय गरेको हो ।

निर्माण कम्पनीले बुधबार जारी गरेको विज्ञप्तिमा आरोप गम्भीर प्रकृतिको भएकाले नैतिकताका आधारमा लम्साललाई चलचित्रबाट निष्कासन गरिएको उल्लेख गरिएको जनाएको छ । 

यसका साथै कम्पनीले घटनाको सत्यतथ्य छानबिनका लागि सम्बन्धित निकायसँग माग पनि गरेको छ ।

चैत २ गतेदेखि झापा आसपास क्षेत्रमा छायाङ्कन भइरहेको उक्त चलचित्रमा लम्सालको करिब ९० प्रतिशत दृश्य छायाङ्कन भइसकेको निर्माण पक्षले जनाएको छ । तर अब उनका कुनै पनि दृश्य चलचित्रमा समावेश नगर्ने निर्णय गरिएको विज्ञप्तिमा उल्लेख छ ।

चलचित्रको छायांकनकै क्रममा मुख्य कलाकार हटाउनु पर्दा आर्थिक क्षति हुने भए पनि पीडित युवतीको पीडाभन्दा त्यो ठूलो नभएको निर्माण टिमले जनाएको छ ।

चलचित्रका प्रस्तुतकर्ता नवीन श्रेष्ठले जघन्य अपराधमा आरोप लागेका व्यक्ति फिल्मको सदस्य रहन नसक्ने स्पष्ट पारेका छन् । 

उनले आरोपितलाई प्रश्रय दिनु वा न्यायिक प्रक्रियामा प्रभाव पार्न सक्ने सम्भावनालाई मध्यनजर गर्दै लम्सालसँगको करार तत्काल रद्द गरिएको बताए ।

निर्माण पक्षले पीडित युवतीले छिटो न्याय पाउनुपर्ने मागसमेत गरेको छ। कम्पनीले घटनाप्रति दुःख व्यक्त गर्दै छायांकनका बाँकी दृश्य पुनः खिच्ने तयारी गरिएको जनाएको छ ।