काठमाडौँ – पोल्यान्डका कप्तान तथा कीर्तिमानी स्ट्राइकर रोबर्ट लेवान्डोव्स्कीले अन्तर्राष्ट्रिय फुटबलबाट सन्न्यास लिने संकेत दिएका छन् । सन् २०२६ को विश्वकपका लागि छनोट हुन असफल भएसँगै पोल्यान्डको फुटबलमा एउटा स्वर्णिम युग समाप्त हुने सम्भावना देखिएको हो ।

स्टकहोममा भएको प्लेअफ फाइनलमा स्विडेनसँग ३–२ ले पराजित भएपछि ३७ वर्षीय लेवान्डोव्स्की निराश देखिएका थिए । उक्त हारसँगै पोल्यान्डको विश्वकप यात्रामा पूर्णविराम लागेको छ । खेल सकिएको केही घण्टापछि लेवान्डोव्स्कीले सामाजिक सञ्जालमा मैदानबाट बाहिरिँदै गरेको भावुक तस्बिर पोस्ट गरेका छन् ।

उनले उक्त तस्बिरको पृष्ठभूमिमा सारा ब्राइटम्यान र आन्द्रेआ बोसेलीको चर्चित गीत ‘टाइम टु से गुडबाय’ राखेका छन् । यसलाई धेरैले उनको अन्तर्राष्ट्रिय फुटबलबाट बिदा हुने औपचारिक संकेतका रूपमा व्याख्या गरेका छन् ।

बार्सिलोनाबाट व्यावसायिक फुटबल खेल्ने लेवान्डोव्स्की र पूर्वप्रशिक्षक मिखाल प्रोबिर्जबीचको विवादपछि उनी गत अगस्टमा मात्र टोलीमा फर्किएका थिए । तर, पोल्यान्ड विश्वकपमा पुग्न नसक्दा उनको लामो र कीर्तिमानी अन्तर्राष्ट्रिय करियर कुनै ठूलो उपलब्धिविना नै टुंगिने देखिएको छ ।

अर्को विश्वकप चार वर्षपछि मात्र हुने भएकाले ३७ वर्षीय यी फरवार्डका लागि यो हार करियरकै सबैभन्दा पीडादायक बनेको छ । सन् २००८ मा डेब्यु गरेका लेवान्डोव्स्कीले २०१४ देखि टोलीको कप्तानी सम्हाल्दै आएका छन् । उनले पोल्यान्डका लागि १६५ खेलमा ८९ गोल गर्दै राष्ट्रिय कीर्तिमान कायम गरेका छन् ।