लेबनान- लेबनान सरकारले हिजबुल्लाहको सैन्य गतिविधिमा तत्काल प्रतिबन्ध लगाउने निर्णय गरेको छ। राष्ट्रपति मिशेल औनले अब युद्ध र शान्तिको निर्णय केवल लेबनानी राज्यकै हातमा हुने बताएका छन्।

सोमबार क्याबिनेटको निर्णयपछि औनले सामाजिक सञ्जाल प्लेटफर्म एक्समा जारी गरेको बक्तव्यमा भनेका छन्, ‘यो कदम राज्यको अधिकार सुरक्षित राख्नका लागि उठाइएको हो।’

हिजबुल्लाहले आफ्ना हतियार सरकारलाई बुझाउनुपर्ने बताउँदै उनले यस निर्णयबाट पछि नहट्ने पनि उल्लेख गरे ।

यो निर्णय लेबनान–इजराइल सिमानामा बढ्दो तनावको बीचमा आएको हो। हालै हिजबुल्लाहले इजराइलतर्फ रकेट प्रहार गरेको थियो।

संगठनले यो कदम नोभेम्बर २०२४ मा भएको युद्धविराम भए पनि इजराइलद्वारा गरिएका सयौँ हमलाको जवाफस्वरूप उठाइएको जनाएको छ।

त्यसपछि सुरू भएको इजरायली बमबारीमा लेबनानमा कम्तीमा ५२ जनाको मृत्यु भएको छ। हिजबुल्लाहले उसका हमलाहरू इजराइल–अमेरिकाद्वारा इरानविरुद्ध जारी सैन्य कारवाहीको जवाफस्वरूप गरिएको जनाएको छ।