काठमाडौं- अमेरिका र इजरायल मिलेर हमला गरेपछि इरानले पनि जवाफी कारवाहीलाई जारी राखेको छ । इरानले खाडी क्षेत्रमा रहेका विभिन्न मुलुकलाई लक्षित गरेर क्षेप्यास्त्र र ड्रोन आक्रमण गरेको छ ।

इरानले विश्व तेल र ग्यास परिवहनका लागि अत्यन्त महत्वपूर्ण मानिने पर्सियन गल्फ, स्ट्रेट अफ हर्मुज, गल्फ अफ ओमान र अरेबियन सी आसपासका क्षेत्रका जहाजमा पनि हमला बढाएको छ । यसअघि इरानको सैन्य दस्ता इस्लामिक रिभल्युसनरी गार्ड कोरको नौसैनिक शाखाले स्ट्रेट अफ हर्मुजमा कुनै पनि जहाजलाई प्रवेश निषेध गरिएको भन्दै उर्दी जारी गरेको थियो ।

यससँगै ती क्षेत्र व्यापारिक जहाजका लागि असुरक्षित बन्दै जान थालेका छन् । हालसम्म इरानी आक्रमणका कारण आधा दर्जनभन्दा धेरै जहाज क्षतिग्रस्त भएको जनाइएको छ ।

पछिल्लो समय ओमानको दुक्म व्यापारिक बन्दरगाहमा रहेको एक इन्धन ट्याङ्करमा पनि ड्रोन आक्रमण भएको छ । ओमानको राष्ट्रिय समाचार एजेन्सीका अनुसार उक्त आक्रमणबाट कुनै मानवीय क्षति भने भएको छैन ।

सुरक्षा निकायले समयमै स्थिति नियन्त्रणमा लिएको जनाइएको छ । आक्रमणका क्रममा भौतिक क्षतिलाई समेत सीमित राखिएको दाबी गरिएको छ । घटनाबारे थप अनुसन्धान भइरहेको समाचारमा उल्लेख छ ।

सन् २०२४ को तथ्याङ्क अनुसार विश्वको कुल तेल आपूर्तिको करिब पाँच भागको एक भाग अर्थात् दैनिक २ करोड ब्यारेल तेल ओमान र इरानको बीचमा रहेको स्ट्रेट अफ हर्मुज भएर ओसारपसार हुने गरेको थियो ।