काठमाडौं – नयाँबानेश्वरमा ट्रकले ठक्कर दिँदा एक जनाको मृत्यु भएको छ ।

जिल्ला प्रहरी परिसर काठमाडौंका प्रवक्ता एसपी पवन भट्टराईका अनुसार मंगलबार बिहान बा. २ क ३२२९ नम्बरको टिपरले सिभिल अस्पताल अगाडि प्रदेश ३–००१ ब. ९४५ नम्बरको सरकारी नम्बरको स्कुटरलाई ठक्कर दिएको हो ।

ट्रकले ठक्कर दिँदा स्कुटरमा सवार सुनसरीको इनरुवा नगरपालिका–५ स्थायी घर भएर भक्तपुरको लोकन्थली बस्ने ४८ वर्षका बद्री कोइरालाको मृत्यु भएको हो । दुर्घटनामा गम्भीर घाइते भएका कोइरालाको उपचारकोक्रममा सिभिल अस्पतालमा मृत्युभ एको हो ।

कोइराला सरकारी कर्मचारी नायब सुब्बा भएको खुलेको छ । प्रहरीले ट्रक चालक गोर्खा घर भएका विकास थापालाई नियन्त्रणमा लिएर घटनाको अनुसन्धान अगाडि बढाएको छ ।