काठमाडौं- नेकपा एमालेका उपाध्यक्ष पृथ्वी सुब्बा गुरुङले जनताले नयाँ अनुहार नभएर नयाँ भिजन खोजेको बताएका छन् ।

प्रेस चौतारी नेपालले मंगलबार काठमाडौंमा आयोजना गरेको निर्वाचन संवाद कार्यक्रममा बोल्दै गुरुङले यस्तो बताएका हुन्।

नेपाली कांग्रेस नयाँ भयो भनिए पनि त्यस्तो नदेखिएको उनले बताएका छन् । ‘कांग्रेसमा नयाँ अनुहार आए,तर नयाँ भिजन आएन´, गुरुङले भने, ‘दोस्रो विशेष महाधिवेशनपछि पनि उहाँहरूको सिद्धान्त, विचार र दर्शनमा कुनै फेरबदल भएको छैन । त्यसैले कांग्रेस यथाअवस्थामै छ ।´

नयाँ दलको चुनौती आइरहेका बेला गुरुङले लामो इतिहास भएका पार्टीको सान्दर्भिकता नसकिने दाबी गरेका छन् ।

‘केही पार्टी र व्यक्तिले आफूलाई नयाँ, अरूलाई पुराना भनेर आर‍ोप लगाइरहेका छन्´ गुरुङले भने, ‘उनीहरू एजेन्डाविहीन हुन् । त्यही भएर उनीहरूले ‘पब्लिक फेस’ गर्न सकेका छैनन् ।´

आगामी फागुन २१ गते हुन लागेको प्रतिनिधि सभाको निर्वाचनमा सम्भावित तालमेललाई लिएर उनले अहिले त्यस्तो अवस्था नदेखिए पनि सम्भावना बाँकी रहने जिकिर गरेका छन् ।