काठमाडौं– राष्ट्रिय मानव अधिकार आयोगका अध्यक्ष तपबहादुर मगरले स्वच्छ, निष्पक्ष र भयरहित वातावरणमा मतदान गर्न पाउने अवस्थाको सुनिश्चितता गर्न आयोगले अनुगमन गर्ने बताएका छन् । 

आगामी फागुन २१ गतेको निर्वाचनको सन्दर्भमा मंगलबार ललितपुरमा सञ्चारकर्मीसंग छलफल गर्दै अध्यक्ष मगरले कसैको डर त्रासमा नभई स्वच्छ, निष्पक्ष र भयरहित वातावरणमा मतदान गर्न पाउने अवस्थाको सुनिश्चितता गर्न आयोगले अनुगमन गर्ने बताएका हुन् ।

उनले सञ्चारमाध्यमले निष्पक्ष भएर गलत सूचनालाई रोक्ने गरी सतर्कता अपनाउनुपर्नेमा जोड दिए । 

चुनावमा भइरहेको ठाउँमा कुनै किसिमबाट बुथ क्यापचर, मतदाताहरूलाई मतदान स्थल पुगी नदिने अवस्था भइरहेको छ वा छैन भन्ने कोणबाट पनि सञ्चार माध्यमले रिपोर्टिङ गरिदिन उनले आग्रह गरे । 

अध्यक्ष मगरले कुनै उम्मेदवार वा दल विशेषको पक्षपोषण हुने खालका सामग्री सम्प्रेषण नगर्न समेत सुझाव दिए । 

उनले निष्पक्ष ढंगले निर्वाचनलाई सफल बनाउन सञ्चारकर्मी र सञ्चारमाध्यमको भूमिका समेत महत्त्वपूर्ण हुने धारणा राखे ।