काठमाडौं – राष्ट्रिय स्वतन्त्र पार्टी (रास्वपा) वरिष्ठ नेता बालेन साहले झापा–५ का सुकुम्बासीका गुनासो सुनेका छन् । काठमाडौंमा जस्तै यहाँका सुकुम्बासी बस्तीमा डोजर चल्छ कि भन्ने चासोको जवाफ दिँदै बालेनले झापामा त्यस्तो नहुने बताएका छन् ।

मंगलबार बिहान कमल गाउँपालिकाको सुकुम्बासी बस्तीमा पुगेर बालेनले यस्तो बताएका हुन् । मतदाताको जिज्ञासामा बालेनले भने– ‘काठमाडौंका सुकुम्बासीलाई बाढीबाट जोगाउन डोजर लगाएँ, यहाँ त्यस्तो हुँदैन ।’

बालेनले खोला किनारका सुकुम्बासीको लागत संकलन भूमि आयोगबाट गरेर स्थानीय तहले लालपूर्जा दिनुपर्नेमा जोड दिए ।
उनले सुकुम्बासीको विषयमा बोल्दै भने, ‘खोलाछेउ बाहेकका सुकुम्बासीको हकमा भूमि आयोगबाट लगत संकलन गरेर स्थानीय सरकारको सिफारिसमा नेपाल सरकारले लालपूर्जा दिनुपर्छ । यहाँको रियल हो । भूमि आयोगमा राजनीतिक पार्टीको मान्छे टीका लगाएर जाने प्रवृत्ति छ । पार्टीसँग नजिक भएकाले एउटा लालपुर्जा भए पनि अर्को पाउने भयो । जिन्दगीमा लालपूर्जा नभएकाले कहिले लालपूर्जा नपाउने भए । त्यो सिस्टम सुधार्नुपर्‍यो भन्ने हो ।’