काठमाडौं- भारत बिहार राज्यको बाँकीपुरमा भाजपाको गढ भत्काउँदै वैकल्पिक राजनीतिक दल जनसुराज पार्टीका संस्थापक प्रशान्त किशोरले सहज जित हासिल गरेका छन् ।

गत जुलाई ३० मा सम्पन्न उपनिर्वाचनको मतपरिणाम अनुसार सबै ३२ चरणको मतगणना सकिँदा किशोरले ६४ हजार १५१ मत प्राप्त गर्दै भाजपा उम्मेदवार नीरज कुमार सिन्हालाई पराजित गरेका हुन् । सिन्हाले कुल ४४ हजार ८२७ मत प्राप्त गरेका छन् ।

त्यसैगरी, राष्ट्रिय जनता दल (आरजेडी) की रेखा कुमारी तेस्रो स्थानमा छिन् । उनले १४ हजार २७२ मत ल्याएकी छिन् ।

बाँकीपुरलाई भाजपा राष्ट्रिय अध्यक्ष नितिन नवीनको परम्परागत निर्वाचन क्षेत्र मानिन्छ । उनी यस क्षेत्रबाट लगातार पाँच पटक विधायक निर्वाचित भएका थिए ।

पीके भनेर चिनिने प्रशान्त किशोरको जितलाई भारतमा हालै भएको ककरोच आन्दोलनसँग पनि जोडेर हेरिएको छ । परम्परागत राजनीतिक दलभन्दा फरक विषयलाई राजनीतिक मुद्दा बनाउँदै आएको जनसुराज पार्टीले सुशासन र सामाजिक न्यायको पक्षमा तथा भ्रष्टाचार र राजनीतिक विरोधमा अभियान सञ्चालन गर्दै आएको छ ।

यसै कारण पीकेले यस चुनावी अभियानमा युवापुस्ताको अपार समर्थन पनि पाए । ककरोच आन्दोलनलाई पीकेले खुलेरै समर्थन समेत गरे । उनले आन्दोलनकारप्रति ऐक्यबद्धता जनाउनेदेखि शिक्षामन्त्री धर्मेन्द्र प्रधानको राजीनामासम्म मागेका थिए ।

‘यदी कक्रोच जनता पार्टीका मान्छेहरु यहाँ आएर विद्यार्थीसँग मिलेर काम गर्छन् भने हामी उनीहरुलाई स्वागत गर्छौँ । सोनम वाङ्चुक मेरा मित्र हुन् ।’ ककरोच आन्दोलन उत्कर्षमा रहेका बेला जीविका दिदी भनिने बिहारका ग्रामिण महिला अगुवाहरुको समर्थनमा आयोजित कार्यक्रममा पीकेले भनेका थिए ।

यसैको परिणामस्वरुप कुनै समय नेताहरूलाई रणनीति सिकाउने पीकेले आज आफ्नै चुनावी जितको उत्सव मनाइरहेका छन् । बिहारको रोहतास जिल्लाको कोनार गाउँमा २० मार्च १९७७ मा जन्मिएका प्रशान्त किशोरको बाल्यकाल चाहिँ बक्सरमा बित्यो ।

उनले सन् १९९१ मा बिहार विद्यालय परीक्षा बोर्ड अन्तर्गत बक्सरको एमपी हाइस्कूलबाट माध्यमिक शिक्षा पूरा गरे भने सन् १९९३ मा पटना साइन्स कलेजबाट उच्च माध्यमिक परीक्षा उत्तीर्ण गरे ।

त्यसपछि उच्च शिक्षाका लागि उनी उत्तर प्रदेशको लखनउ पुगे । लखनउ विश्वविद्यालयबाट उनले सन् १९९६ देखि १९९९ सम्म बीबीए पढे । हैदराबादमा उनले स्नातकोत्तर तह पूरा गरे । हैदराबादस्थित एडमिनिस्ट्रेटिव स्टाफ कलेज अफ इण्डियाबाट उनले मास्टर अफ हेल्थकेयर एडमिनिस्ट्रेशन एमएचए पूरा गरे ।

थप अध्ययनका लागि उनी सन् २०१० मा फ्रान्स पुगे । त्यहाँको क्लेरमों-फेरां विश्वविद्यालयसँग आबद्ध क्याबिलाम भिची नामक संस्थाबाट उनले फ्रेन्च भाषा अध्ययन गरे ।

राजनीतिमा प्रवेश गर्नुअघि प्रशान्त किशोरले झन्डै आठ वर्षसम्म संयुक्त राष्ट्रसंघको आर्थिक सहयोगमा सञ्चालित सार्वजनिक स्वास्थ्य कार्यक्रमहरूमा महत्त्वपूर्ण जिम्मेवारी सम्हालेका थिए । यस क्रममा उनी स्वास्थ्य र विकाससँग जोडिएका थुप्रै परियोजनाहरूमा सक्रिय रहे । यही कालखण्डले उनलाई प्रशासनिक कार्यशैली, नीति निर्माण र जनस्तरको आवश्यकतालाई सूक्ष्म रूपमा बुझ्न बलियो आधार दियो ।

पछि संयुक्त राष्ट्रसंघको सुरक्षित र आरामदायी जागिरलाई पछाडि छाड्दै उनले सार्वजनिक जीवनको मार्ग बदल्ने निर्णय गरे । उनले ‘इन्डियन पोलिटिकल एक्शन कमिटी’ नामक संस्था स्थापना गरेर चुनावी रणनीतिकारको रूपमा आफ्नो नयाँ पहिचान बनाए ।

समयसँगै उनले भारतका धेरै दिग्गज नेता र विभिन्न राजनीतिक दलका लागि काम गरे । उनका चुनावी योजना र रणनीतिहरू धेरै पटक ऐतिहासिक जितमा सहयोग पुर्‍याए ।

वर्षौँसम्म अरूका लागि मात्र रणनीति तयार पार्दै आएका प्रशान्त किशोरले सन् २०२४ मा आएर आफ्नै पार्टी खोल्ने निधो गरे । सोही वर्षको अक्टोबर २ का दिन उनले ‘जनसुराज’ नामक राजनीतिक दलको औपचारिक घोषणा गरेका थिए ।

गत विधानसभा चुनावमा जनसुराजले राम्रो प्रदर्शन गर्न नसकेपनि उपनिर्वाचनमा भने टाउको उठाउँदै प्रशान्त किशोरले सत्तारुढ भारतीय जनता पार्टीलाई नराम्रो हार चखाएका छन् ।