काठमाडौं – देशको सबैभन्दा ठूलो मल्टिप्लेक्सन चेन क्यूएफएक्सका हलहरूमा हिमालमा हुने अपराध झल्को दिने र थ्रिल महसुस गराउने एक फिल्मको टिजर देखाइन सुरू भएको छ ।

फिल्म सुरुभन्दा अघिको समयमा उक्त नेपाली फिल्म ‘हिमालयन गोल्ड’को टिजर देखाइन्छ । तथापि, यस फिल्मको प्रदर्शन मिति सार्वजनिक भएको छैन । न यो टिजर सामाजिक सञ्जालमा नै सार्वजनिक गरिएको छ ।

टिजरमा कलाकार स्वर्गीय सुनील थापा, नायक कर्मा शाक्य र नायिका परीक्षा लिम्बूलाई प्रस्तुत गरिएको छ । सुनीलको ओझिलो आवाजका संवाद मात्रै टिजरमा समावेश छ ।

हिमालका मनमोहक र केही व्यक्तिका रहस्यमयी दृश्यले दर्शकलाई फिल्मप्रति आकर्षण गर्ने उच्च सम्भावना यस टिजरमा भेटिन्छ । नायक कर्माको क्रोधित रहस्यमयी लुक्स टिजरको अर्को आकर्षण हो ।

हिमाली भेगमा पाइने बहुमूल्य जडीबुटी यार्चागुम्बालाई ‘हिमालयन गोल्ड’ भनिन्छ । ‘हिमालयन गोल्ड’का लागि हुने अपराधको कथामा यो फिल्म बनेको टिजरले संकेत गर्छ ।

गज्जब सिनेम्याटिक अनुभवका साथमा रहस्यमयी कथा रहेको महसुस गराउने यो टिजरले सम्भावना बोकेको फिल्म बनाइएको संकेत गर्छ । त्यसै पनि नेपालमा हिमालका कथामा कमै फिल्म बन्ने गर्छन् ।

यो फिल्मको छायाङ्कन गत वर्ष भएको हो । ह्वाइट एलिफन्ट मोसन पिक्चरको निर्माण सहकार्यमा बनेको यस फिल्मको लेखक र निर्देशक धिराज राजवंशी हुन् ।

नायिक मेनुका प्रधान पनि यस फिल्मको शीर्ष कलाकार हुन् । यो टिजर केही सातापछि मात्रै युट्युबमा सार्वजनिक हुने बुझिएको छ ।