काठमाडौं- नेपाली कांग्रेसका तीन नेताहरूले आज छलफल गरेका छन् । पछिल्लो समय संस्थापन पक्षमा खुलेका तीन नेताले आज विमलेन्द्र निधिको निवास मध्य वानेश्वरमा छलफल गरेका हुन् । निधिसँगै छलफलमा डा. प्रकाशमान सिंह र डा. शशांक कोइराला सहभागी थिए ।

पछिल्लो समय पार्टीमा देखिएको विवाद र संस्थापन पक्षले छुट्टै पार्टी कार्यालय स्थापना गर्न लागेको लगायतका विषयमा छलफल केन्द्रित थियो। बैठकमा उपस्थित एक नेताको सचिवालयले दिएको जानकारी अनुसार भोलि शीर्ष नेताहरू कांग्रेस पूर्वकार्यवाहक सभापति पूर्णबहादुर खड्काको निमन्त्रणामा बैठक बस्न लागेका छन् । भोलिको बैठकमा कांग्रेसको १५औं महाधिवेशन लगायतका विषयमा केन्द्रित रहेर कुराकानी हुनेछ ।

यस्तै, संस्थापन पक्षले छुट्टै कार्यालय खोल्न लागेको विषय लगायतमा केन्द्रित रहेर कुराकानी हुने बताइएको छ । कांग्रेस महामन्त्री गगन थापा निकट नेताहरू भने संस्थापन पक्षले घुर्की मात्रै लगाएको आरोप लगाउँछन् । आजको बैठकमा पनि तीन नेताहरूले कांग्रेस पार्टी विभाजनतर्फ नलागेर पन्ध्रौं महाधिवेशनको तयारी तर्फ लाग्नुपर्ने निष्कर्ष निकालेको स्रोतको दाबी छ ।

कांग्रेसले विशेष महाधिवेशन गरेर फागुन २१ को निर्वाचन अगाडि गगन थापा सभापति बनेका थिए । त्यसलाई संस्थापन पक्ष शेरबहादुर देउवा तत्कालीन कार्यवाहक सभापति पूर्णबहादुर खड्का लगायतका नेताहरुले अस्वीकार गर्दै आएका छन् ।