काठमाडौं– राष्ट्रिय स्वतन्त्र पार्टीकी सांसद टिका संग्रौला (ज्वाला) ले अछामको मंगलसेन नगरपालिका–५ का रेवन्त विष्ट एक महिनादेखि सम्पर्कविहीन रहेको उल्लेख गर्दै उनको खोजी कार्यलाई उच्च प्राथमिकतामा राख्न सरकारसँग माग गरेकी छन् ।

प्रतिनिधिसभाको बैठकमा बोल्दै उनले अध्ययनका लागि काठमाडौंको कीर्तिपुरमा बस्दै आएका विष्ट करिब एक महिनादेखि सम्पर्कविहीन रहेको बताइन् । 

प्रारम्भिक जानकारीअनुसार उनको अन्तिम लोकेसन सीतापाइला–स्वयम्भू क्षेत्रको जंगल आसपास देखिए पनि अहिलेसम्म उनको अवस्था सार्वजनिक हुन नसकेको उनले उल्लेख गरिन् ।

उनलेले प्रत्येक दिन बित्दै जाँदा परिवारको पीडा झन् गहिरिँदै गएको भन्दै यो विषय एउटा परिवारको दुःखमा मात्र सीमित नभई नागरिकको सुरक्षाप्रति राज्यको जिम्मेवारीसँग जोडिएको गम्भीर सवाल भएको बताइन् ।

उनले नेपाल सरकार, गृह मन्त्रालय, नेपाल प्रहरी तथा सम्बन्धित सबै सुरक्षा निकायलाई आधुनिक प्रविधि, आवश्यक जनशक्ति र प्रभावकारी समन्वय परिचालन गर्दै विष्टको खोजी कार्य तत्काल तीव्र बनाउन आग्रह गरे । साथै खोजी कार्यको प्रगतिबारे परिवारलाई नियमित रूपमा जानकारी गराउन पनि माग गरिन् ।

सांसद संग्रोलाले केही दिनअघि सिंहदरबारको प्रवेशद्वारमा रेवन्त विष्टका परिवारका सदस्यसँग भेट भएको प्रसङ्ग पनि सुनाए । उनले परिवारका सदस्यहरूले विष्टको तस्बिर बोकेर न्यायको याचना गरिरहेको देखेको र आफूलाई तस्बिर बुझाउँदै खोजीका लागि पहल गरिदिन अनुरोध गरेको बताइन् ।

‘उहाँहरूको सिंहदरबारसम्म पहुँच नभए पनि मसम्म पुग्नुभयो। मैले उहाँहरूको तस्बिर सरकारसमक्ष पुर्‍याएर न्यायका लागि सक्दो पहल गर्ने प्रतिबद्धता जनाएको थिएँ,’ उनले भनिन् ।