काठमाडौं– नेपाली कला, संस्कृति तथा धार्मिक सम्पदाप्रति जनचेतना अभिवृद्धि गर्ने उद्देश्यले पाल्पासा आर्ट ग्यालरीले बालकुमारीमा धार्मिक तथा सांस्कृतिक विषयवस्तुलाई समेटिएको भित्तेचित्र निर्माण गरेको छ । 

उक्त चित्रमार्फत नेपालका विविध धार्मिक आस्था, सांस्कृतिक परम्परा, मौलिक जीवनशैली तथा सामाजिक सहअस्तित्वलाई कलात्मक रूपमा अभिव्यक्त गरिएको छ । 

चित्रले नेपाली समाजको सांस्कृतिक विविधता र धार्मिक सहिष्णुतालाई प्रतीकात्मक रूपमा प्रस्तुत गर्दै आफ्नो मौलिक पहिचान संरक्षणको सन्देश प्रवाह गरेको देखिन्छ । 

पछिल्लो समय तीव्र शहरीकरण र आधुनिकीकरणका कारण ओझेलमा पर्दै गएका सांस्कृतिक मूल्य र परम्परालाई दृश्यकलामार्फत स्मरण गराउने प्रयासस्वरूप यो सिर्जना गरिएको हो । 

सार्वजनिक स्थलमा निर्माण गरिएको उक्त कलाकृतिले स्थानीयवासी तथा सर्वसाधारणको ध्यान आकर्षित गर्नुका साथै नेपाली कला, संस्कृति र धार्मिक सम्पदाको संरक्षण तथा प्रवर्द्धनमा दृश्यकलाको प्रभावकारी भूमिकालाई उजागर गरेको छ ।

तस्बिर : नेपाल फोटो लाइब्रेरी