काठमाडौं- प्रमुख प्रतिपक्षी दल नेपाली कांग्रेसले संसद्सँगै अब संसदीय समितिका बैठक पनि बहिष्कार गर्ने भएको छ।

प्रधानमन्त्री वालेन्द्र शाह (बालेन)ले संसद्मा उभिएर माफी नमागेसम्मम कांग्रेसले आगामी २५ जेठसम्म संसदीय समितिका बैठकमा सहभागी नहुने दलका नेता भीष्मराज आङ्देम्बेले बताए । प्रतिपक्षीको निरन्तर विरोधका कारण संसद् पनि जेठ २५ सम्मलाई रोकिएको छ।

आइतबार प्रतिनिधि सभाको प्रश्नोत्तर कार्यक्रममा बालेनले `नेपालले पनि भारतको भूमि मिचेको रहेछ´ भन्ने अभिव्यक्ति दिएपछि कांग्रेसले माफी माग्नुपर्ने भन्दै सदन अवरोध गरिरहेकाे छ । कांग्रेससँगै अन्य विपक्षी दल पनि विरोधमा उत्रिएका छन् ।

सांसदलाई कानुनभन्दा माथि राख्नेगरी सत्ताको बलमा पेलेर प्रतिनिधि सभा नियमावली पारित गरिएको भन्दै कांग्रेसले आपत्ति जनाएको छ । अब कांग्रेसले संसदीय समितिका बैठक पनि बहिष्कार गर्ने निर्णय लिएको हो ।