काठमाडौं- संसद बैठक सकिएलगत्तै बिहीबार राष्ट्रिय स्वतन्त्र पार्टीको संसदीय दलको बैठक सिंहदरबारमा सुरु भएको छ । आजको बैठकले प्रतिनिधिसभाको सभामुख, उपसभामुख, संसदीय दलको नेता उपनेता, प्रमुख सचेतक र सचेतकको विषयलाई टुङ्ग्याउने देखिन्छ ।

राष्ट्रिय स्वतन्त्र पार्टीबाट सभामुखका लागि उपाध्यक्ष डोलप्रसाद डीपी अर्यालको नाम अगाडि आएको छ भने प्रमुख सचेतकका लागि महामन्त्री कवीन्द्र बुर्लाकोटीको नाम आएको छ । संसदीय दलको उपनेता र सचेतकको विषयमा भने अहिलेसम्म कुनै नेताले मुख खोल्न सकेका छैनन् ।

प्रतिनिधि सभाले २२ गते सभामुख र उपसभामुख चयन गर्ने तयारी गरेको छ । सभामुख पद राष्ट्रिय स्वतन्त्र पार्टीलाई दिँदा उपसभामुख पद प्रतिपक्षीलाई दिइने व्यवस्था छ । पार्टीले उपसभामुख पद प्रतिपक्षी दल नेपाली कांग्रेस, नेपाली कम्युनिस्ट पार्टी र श्रम संस्कृति पार्टीमध्ये एकलाई दिने अवस्था देखिन्छ ।

आजको बैठकमा आगामी दिनमा सदनमा सांसदहरूको प्रस्तुतिको विषयमा पनि सामान्य छलफल हुने नेताहरु बताउँछन् ।