काठमाडौं- प्रहरीले व्यवसायी दीपक भट्टलाई बिहीबार दिउँसो पक्राउ गरेको छ।

उनलाई नेपाल प्रहरीको केन्द्रीय अनुसन्धान ब्यूरो (सीआईबी)को टोलीले नक्सालबाट पक्राउ गरेको हो ।

सीआईबी प्रवक्ता एवम् एसएसपी शिवकुमार श्रेष्ठले भट्ट पक्राउ परेको पुष्टि खबरहबलाई गरेका छन् ।

बालेन्द्र शाह नेतृत्वको सरकारले व्यवसायी दीपक भट्टलाई चैत १६ गते अध्यागमनको कालोसूचीमा राखेको थियो। यससँगै सरकारले उनको राहदानी पनि रोक्का गरिदिएको थियो ।

गत शुक्रबार राष्ट्रिय स्वतन्त्र पार्टीका वरिष्ठ नेता बालेन्द्रको नेतृत्वमा करिब दुईतिहाइ नजिकको शक्तिशाली सरकार बनेसँगै सम्पत्ति शुद्धीकरण कसुरमा कयौँमाथि छानबिन अघि बढेको थियो ।

सरकारले पूर्वप्रधानमन्त्री केपी शर्मा ओली, पुष्पकमल दाहाल प्रचण्ड, शेरबहादुर देउवा र माधवकुमार नेपालसहितमाथि सम्पत्ति शुद्धीकरण कसुरमा छानबिन थालेको थियो।

त्यही छानबिनका क्रममा पहिलो चरणमा कम्तीमा पनि डेढ सयजनामाथि सरकारले सम्पत्ति शुद्धीकरण कसुर लगाउने तयारी गरेको छ।