काठमाडौं- नवनिर्वाचित प्रतिनिधिसभाको पहिलो बैठक बिहीबार दिउँसो सिंहदरबारस्थित नयाँ संसद् भवनमा बसेको छ । बैठकमा ज्येष्ठ सदस्य अर्जुननरसिंह केसीले बैठकको अध्यक्षता गरेका छन् ।

बैठक सुरु हुनेबित्तिकै नेकपा (एमाले)का सांसदहरूले उठेर विरोध जनाएका थिए । विरोधका क्रममा एमालेका सांसद गुरु बरालले संविधानको मौलिक हक हनन भएको भन्दै सरकारको आलोचना गरे ।

बरालले भने, ‘नेपालको संविधानको भाग २ अन्तर्गत धारा १६ ले हरेक नागरिकलाई सम्मानपूर्वक बाँच्न पाउने अधिकार दिएको छ । धारा १७ ले स्वतन्त्रताको हक र धारा १८ ले समानताको हक सुनिश्चित गरेको छ । तर, अहिले देशमा यी मौलिक हकहरू खोस्ने काम भइरहेको छ ।’

उनले पूर्वप्रधानमन्त्री केपी शर्मा ओली र तत्कालीन गृहमन्त्री रमेश लेखकलाई फौजदारी कार्यविधिको दुरुपयोग गरी बन्दी बनाइएको आरोप लगाए ।

‘काठमाडौं लगायत देशका विभिन्न ठाउँमा शान्तिपूर्ण प्रदर्शन गर्दा सरकारले चर्को दमन गरेको छ,’ बरालले भने ।

एमालेका सांसद साजिद सिद्धिकी र विष्णुमाया विकमाथि भएको आक्रमणको पनि उनले उल्लेख गरे ।

‘उहाँहरूलाई गम्भीर चोट लाग्ने गरी प्रहरीबाट कुटपिट गरिएको छ । त्यस घटनामा संलग्नहरूमाथि छानबिन गरी दोषीलाई कारबाही गर्न माग गर्छु,’ उनले बैठकमा भने ।

यस्तै, एमाले सुर्खेत जिल्ला कार्यालयमा प्रवेश गरी जिल्ला अध्यक्षसहित दर्जनौं नेताहरूमाथि कुटपिट गरी घाइते बनाइएको घटनाको पनि बरालले चर्चा गरे ।

‘राष्ट्रिय स्वतन्त्र पार्टीको सरकार आएसँगै देशमा लोकतन्त्रविरोधी गतिविधि बढेका छन् । देश संविधानअनुसार चलोस् भन्ने हाम्रो अपेक्षा छ,’ उनले थपे ।

बरालले ओली र लेखकको तत्काल रिहाइ, सांसदहरूमाथि आक्रमण गर्नेहरूमाथि छानबिन र भदौ २३ गतेको घटनामा एकपक्षीय कारबाही नगर्न सरकारलाई आग्रह गरे ।

उनले भदौ २४ गतेको घटनालाई बेवास्ता गरी गौरीबहादुर कार्की नेतृत्वको जाँचबुझ आयोग मौन रहेको र सरकारले पनि एकपाटो मात्र कारबाही थालेको भन्दै निन्दा गरे ।

बैठकमा एमाले सांसदहरूले संविधानको पालना, मौलिक हकको रक्षा र राजनीतिक प्रतिशोध रोक्न माग गर्दै विरोध जनाएका थिए । यो घटनाले नयाँ संसद्को सुरुवाती दिनमै राजनीतिक तनाव बढ्ने संकेत पनि गरेको छ।