काठमाडौं – युरोपेली शक्ति राष्ट्रले इरानलाई संयमित हुन दबाब दिएका छन्। बेलायत, फ्रान्स र जर्मनीले आफ्ना छिमेकी राष्ट्रमाथि इरानले गरेको क्षेप्यास्त्र आक्रमणको निन्दा गर्दै संयमित हुन दबाब दिएका हुन्।

बेलायती प्रधानमन्त्री किअर स्टार्मर, फ्रान्सेली राष्ट्रपति इमानुएल म्याक्रोन र जर्मन चान्सलरले तेहरानलाई आक्रमण रोक्न आह्वान गरेका हुन्।

उनीहरुले संयुक्त विज्ञप्ति सार्वजनिक गर्दै मध्यपूर्वमा आफ्ना हितहरूको रक्षाका लागि आवश्यक कदम चाल्न आफूहरू तयार रहेको समेत स्पष्ट पारेका छन्।

‘हामी यस क्षेत्रमा रहेका हाम्रा र हाम्रा सहयोगीका हितहरूको रक्षाका लागि ठोस कदम चाल्नेछौँ’, संयुक्त वक्तव्यमा भनिएको छ, ‘यसका लागि इरानले जहाँबाट क्षेप्यास्त्र र ड्रोन प्रहार गर्छ, सोही स्रोतलाई नै नष्ट गर्नेगरी आवश्यक र समानुपातिक रक्षात्मक कारबाही अघि बढाउन समेत हामी तयार छौँ।’