काठमाडौं– बलिउड निर्देशक संदीप रेड्डी वाङ्गा र अभिनेता प्रभासको पहिलो सहकार्यमा बनेको प्यान–इन्डिया फिल्म स्पिरिटको पहिलो लुक फ्यानहरूका लागि नयाँ वर्षको उपहारका रुपमा सार्वजनिक गरिएको छ। 

बाहुबली अभिनेता प्रभास र वाङ्गा दुवै उच्च-प्रभावशाली, दमदार सिनेमाका लागि परिचित भएकाले फिल्म घोषणा हुनेबित्तिकै नै दर्शक र मिडियाको ध्यानाकर्षणमा रहँदै आएको थियो ।

फिल्मको कास्टिङले पनि चर्चा बटुलेको छ। प्रारम्भमा अभिनेत्री दीपिका पादुकोणलाई फिल्ममा जोडिनुपर्ने थियो, तर काम गर्ने समय सम्बन्धी असमति भएपछि उनी बाहिरिएकी थिइन् । त्यसपछि त्रिप्ती डिम्रीलाई कास्ट गरिएको छ । यो त्रिप्तीको प्रभाससँग पहिलो सहकार्य हो भने, निर्देशक वाङ्गासँग उनको एनिमल पछि दोस्रो सहकार्य पनि हो ।

फिल्ममा प्रभास र त्रिप्ती डिम्रीसँगै विवेक ओबेरॉय र कन्चना लगायतका कलाकारहरू पनि मुख्य भूमिकामा छन् । टी–सीरीजको ब्यानरमा निर्माण भइरहेको यो फिल्म वाङ्गाको भव्य कथावस्तु र प्रभासको प्यान–इन्डिया स्टारडम अनुरूप उत्कृष्ट शैलीमा बनिरहेको छ ।

पहिलो लुक सार्वजनिक भएपछि फिल्मको प्रचार गति बलियो भएको छ। स्पिरिट २०२६ को सबैभन्दा प्रतिक्षित फिल्ममध्ये एक बन्ने तयारीमा छ, जसले यस वर्षको सिनेमाई सुरुवात उच्च-उत्साहपूर्ण र धमाकेदार हुने संकेत दिएको छ ।