एजेन्सी– अमेरिकी राष्ट्रपति डोनाल्ड ट्रम्पले देशमा डिजेलको कमी देखिन थालेपछि अमेरिकाबाट डिजेल निर्यातमा प्रतिबन्ध लगाउनेबारे संकेत गरेका छन्।

ट्रम्पले युरोपेली देशहरूलाई आफ्नो डिजेल भण्डारको केही हिस्सा आवश्यक परे बजारमा जारी गर्न आग्रह गर्न सकिने बताएका छन्। उनको यो भनाइ अमेरिकी वित्तमन्त्री स्कट बेसेन्टले युरोपेली देशहरूलाई डिजेलको भण्डार तयार राख्न र आवश्यकता परे त्यसलाई बजारमा ल्याउन गरेको आग्रहपछि आएको हो।

बेसेन्टले डिजेलको बढ्दो मूल्यको भार अमेरिकी किसान, ट्रक चालक तथा व्यवसायीमाथि पर्न नहुने बताएका छन्।

इरानमा जारी युद्धका कारण विश्व बजारमा डिजेलको मूल्य बढिरहेका बेला अमेरिकाले निर्यातमा प्रतिबन्ध लगाउने चेतावनी दिएको हो। अमेरिकामा हुने मध्यावधि निर्वाचनअघि इन्धनको मूल्य र आपूर्तिको विषय अमेरिकी मतदाताका लागि महत्वपूर्ण मुद्दा बनेको छ।

बिहीबार बेलायतले पनि सम्भावित अमेरिकी निर्यात प्रतिबन्धको अवस्थालाई ध्यानमा राख्दै युरोपेली साझेदारहरूसँग डिजेल भण्डार बजारमा जारी गर्ने विषयमा छलफल गरेको थियो।

अमेरिका विश्व बजारमा डिजेल आपूर्ति गर्ने प्रमुख मुलुकमध्ये एक हो। अमेरिकाले दैनिक करिब १२ लाखदेखि १५ लाख ब्यारेल डिजेल निर्यात गर्ने गरेको छ।

तर, विशेषज्ञहरूले अमेरिकाले विदेशमा हुने डिजेल आपूर्ति निर्यातमा प्रतिबन्ध लगाए अन्य देशको आपूर्तिमा दबाब बढ्नुका साथै मूल्य थप बढ्न सक्ने चेतावनी दिएका छन्।