काठमाडौं- प्रधानमन्त्री वालेन्द्र शाहले भोटेकोशी नदीमा आएको भीषण बाढीका कारण लेदोले थुनिएका जलविद्युत् आयोजनाका सुरुङमा तत्काल उद्धार सम्भव नभएको बताएका छन्।

बुधबार प्रतिनिधिसभा बैठकमा सांसदहरूको प्रश्नको जवाफ दिँदै प्रधानमन्त्री शाहले बाढीले सुरुङ पूर्ण रूपमा थुनिएकाले उद्धारका लागि अनुकूल अवस्था पर्खनुपर्ने बताए।

उनका अनुसार भोटेकोशी र त्रिशूली क्षेत्रमा थुनिएका सुरुङ पहिरोका कारण नभई बाढीसँगै आएको लेदोले भरिएका हुन्। यस्तो प्रकृतिको घटना विश्वमै नयाँ भएकाले तत्काल उद्धार गर्न सक्ने प्रविधि नेपालसँग नरहेको उनको भनाइ छ।

‘हामीसँग ती बाढी पसेर थुनिएका सुरुङबाट तत्कालै उद्धार गर्न सक्ने प्रविधि छैन,’ प्रधानमन्त्री शाहले भने, ‘जतिबेला मौसमले साथ दिन्छ र सुरुङमा पसेको हिलो सुक्ने अवस्था बन्छ, त्यहाँ पस्न र अडिन सक्ने अवस्था हुन्छ, त्यसबेला मात्रै उद्धार सम्भव हुन्छ।’

उनले यसअघि विश्वका विभिन्न स्थानमा भएका सुरुङ तथा पहिरो उद्धारका घटनासँग अहिलेको अवस्था तुलना गर्न नमिल्ने बताए। उनका अनुसार अन्य देशमा भएका अधिकांश उद्धार पहिरोमा परेकाहरूको उद्धारसँग सम्बन्धित थिए।

प्रधानमन्त्री शाहले सुरुङको मुखमा ठूलो संख्यामा डोजर तथा अन्य उपकरण परिचालन गर्नसमेत भौगोलिक अवस्थाका कारण सम्भव नरहेको बताए। ‘बाढीले थुनिएका ती सुरुङको मुखमा ८/१० वटा डोजर उतार्ने अवस्था छैन। त्यहाँको भूगोलले पनि त्यो सम्भव छैन,’ उनले भने।

उद्धारका लागि नेपालसँगै चीन र भारतका विज्ञहरू समेत परिचालन गरिएको उनले जानकारी दिए। घरमा बसेर वा घटनास्थलको बाहिरी अवस्था हेरेर उद्धार किन भएन भन्ने प्रश्न उठे पनि सुरुङभित्रको वास्तविक अवस्था फरक रहेको उनको भनाइ छ।

प्रधानमन्त्री शाहले उद्धारमा खटिएका सुरक्षा निकायप्रति विश्वास गर्न आग्रह गर्दै सामाजिक सञ्जाल तथा सञ्चारमाध्यममा आएका आलोचनाबाट सरकार विचलित नभएको बताए।

‘हामीले गर्ने काम गरिरहेका छौँ,’ उनले भने, ‘सशस्त्र प्रहरी, नेपाल प्रहरी र नेपाली सेनालाई यो भएन, त्यो भएन नभन्नुहोस्, उनीहरूलाई प्रोत्साहन गर्नुहोस्।’