काठमाडौं– रसुवा बाढीका कारण बेपत्ता भएका नागरिकका आफन्तजनहरूले छिटो खोजी कार्य गर्न आग्रह गरेका छन् ।  

आफन्तको खोजीमा त्रिशूलीस्थित सैन्य तालिम केन्द्रमा ठूलो संख्यामा बेपत्ताका आफन्तहरू पुग्ने गरेका छन् । सेनाले उद्धार गरेर सैन्य तालिम केन्द्र ल्याउने भएकाले उनीहरू सोही स्थानमा पुगेर आफ्ना आफन्तका बारे जानकारी गराउने गरेका छन् । 

बेपत्ता आफन्त भेटिने आसमा पुगेकाहरूले बाढी प्रभावित रसुवाका माथिल्लो भेगमा उद्धारको प्रतीक्षामा रहेको हुन सक्ने भएकाले सबै स्थानमा छिटो खोजी कार्य गर्न आग्रह गरेका छन् ।

नेपाली नागरिक मात्रै नभई बेपत्ता भएका विदेशी नागरिकहरू पनि फोटो सहित आफन्तको खोजीमा त्रिशूली सैन्य तालिम केन्द्र पुगेका छन् । 

विपद् प्राधिकरणका अनुसार बाढीका कारण ५ सय भन्दा बढी विदेशी नागरिकसहित करिब चार हजार व्यक्ति सम्पर्कविहीन रहेका छन् । 

हालसम्म २ सय ७३ जना विदेशी सहित ११ हजार ९ सय ९३ जनाको उद्धार गरिएको छ ।