काठमाडाैँ – गृहमन्त्री सुधन गुरुङले बाढीपछि जारी खोज, उद्धार, शव व्यवस्थापन र राहत वितरणमा सरकारले सम्पूर्ण शक्ति लगाएको दाबी गरेका छन् । उद्धारका क्रममा केही कमजोरी भएको हुन सक्ने भन्दै उनले सर्वसाधारणसँग माफीसमेत माग्दै खबरदारी गर्न आग्रह गरेका छन् ।

राष्ट्रिय विपद् जोखिम न्यूनीकरण तथा व्यवस्थापन प्राधिकरणद्वारा मंगलबार आयोजित पत्रकार सम्मेलनमा मन्त्री गुरुङले सोचेभन्दा ठूलो क्षति भएकाले सुरुवाती उद्धार कार्यमा केही कठिनाइ भएको बताए । बाढीपछि पहिलोपटक सञ्चारकर्मीहरूसँग साक्षात्कार गर्दै उनले सुरुङभित्र थपिएका व्यक्तिको सकुशल उद्धारका लागि हरसम्भव प्रयास भइरहेको स्पष्ट पारे ।

“पावरहाउसको माथिल्लो भागबाट खनेर प्वाल पारी हावा र रासन पठाउन सकिन्छ कि भनेर प्रयास गरिरहेका छौँ,” उनले भने । दलदल र टालिएको सुरुङका कारण विदेशी विज्ञ टोलीलाई समेत उद्धारमा चुनौती थपिएको उनको भनाइ छ । सम्भावित दुर्घटनाको जोखिमलाई ध्यानमा राख्दै निजी क्षेत्रका हेलिकोप्टर उडानमा रोक लगाइएको उनले प्रस्ट्याए ।

बाढी आएकै भोलिपल्टदेखि नुवाकोट पुगेर स्थलगत समन्वयमा खटिएका मन्त्री गुरुङले सीमित स्रोत–साधनका बाबजुद सुरक्षाकर्मीले अधिकतम क्षमता प्रयोग गरेको दाबी गरे । नेपालको इतिहासमै विपद् उद्धारमा यति धेरै हेलिकोप्टर पहिलोपटक प्रयोग गरिएको दाबी गर्दै उनले भने, “राज्यको भएभरको संयन्त्र परिचालन गरेका छौँ । डाँडाकाँडामा अलपत्र परेकाको हेलिकोप्टरमार्फत रेकी गरी उद्धार र राहत पहुँच बढाउने काम भइरहेको छ ।”