काठमाडौं । कवि तारा सुवेदीको पहिलो कवितासंग्रह ‘अनुभूतिका महक’ एक कार्यक्रमबीच लोकार्पण गरिएको छ ।

नेपाल स्रष्टा समाजद्वारा आइतबार काठमाडौंमा आयोजित कार्यक्रममा अग्रज कवि शैलेन्द्र साकार लगायतले उक्त कविताकृतिको औपचारिक लोकार्पण गरे ।

कृति सार्वजनिक गर्दै २० वर्षअघिदेखि कवि सुवेदी कविताका क्षेत्रमा सक्रिय रहेको उल्लेख गर्दै उनी राम्रो कवि भएको बताए । उनले सुवेदीको पहिलो कृतिबाट एउटा कविता वाचन गरे ।

पत्रकारितासँगै साहित्य र समाजसेवाका क्षेत्रमा क्रियाशील कवि सुवेदीको कृतिमाथि समीक्षात्मक टिप्पणी गर्दै प्रा.डा. कृष्णप्रसाद दाहालले फुटकर रूपमा कविता लेख्दा नै कविको पहिचान बनाइसकेकी ताराका कवितामा जीवनबोध र युगबोध समेटिएको बताए ।

प्रा.डा. लक्ष्मणप्रसाद गौतमले सुवेदीका कविताहरू महकयुक्त रहेको उल्लेख उनका कविता हृदय हुँदै मस्तिष्कसम्म पुग्ने बताए ।

कार्यक्रममा साहित्यकारहरू भागीरथी श्रेष्ठ, विधान आचार्य, चन्द्रप्रसाद भट्टराई, पवन आलोक, विवश पोखरेल, राधेश्याम लेकाली, श्रीओम श्रेष्ठ रोदन, डा. शान्तिमाया गिरी र कवि सुवेदीले आफ्ना धारणा राखे ।

उक्त अवसरमा मणि लोहनी, रञ्जना निरौला, प्रकाश घायल, खुसी अधिकारीले कृतिभित्रका कविता वाचन गरे ।