काठमाडौं – ७ करोडभन्दा बढी ग्रस कलेक्सन गर्ने ब्लकबस्टरको संज्ञा दिँदै चलचित्र विकास बोर्डले ३१ फिल्मको सूची सर्वाजनिक गरेको छ ।

बोर्डले २६ औैं वार्षिक उत्सवको अवसरमा विगतमा सबैभन्दा बढी ग्रस कलेक्सन गर्ने फिल्मको सूची निकालेको हो । जसमा २५ औं वार्षिक उत्सवमा २५ हिट फिल्मको सूची निकालेको थियो । यो वार्षिक उत्सवमा गत वर्ष प्राविधिक कारणले नसमेटिएका केही र गत वर्षमा प्रदर्शनमा आएका हिट फिल्म समेटिएको छ । अहिले उक्त हिट फिल्मको सूचीमा ३१ वटा अटाएका छन् ।

निश्चल बस्नेत निर्देशित फिल्म ‘लुट २’ ९ वर्षअघि रिलिज भएको हो । तर, गत वर्षको २५ हिट फिल्मको सूचीमा यो समावेश थिएन । अहिले भने राखिएको छ । बोर्डका अनुसार यो फिल्मले ९ करोड २१ लाख ग्रस कलेक्सन गरेको छ । यो २० औं हिट फिल्म हो ।

त्यस्तै, २६ वर्षअघि प्रदर्शनमा आएको सुशील क्षेत्री स्टारर फिल्म ‘आगो’ पनि यो वर्ष हिट फिल्मको सूचीमा अटाएको छ । यो उक्त सूचीको अन्तिम अर्थात् ३१ नम्बरमा छ । यसको ग्रस कलेक्सन ७ करोड २० लाख छ ।

सोलो आए पल

गत वर्ष नै नायक पल शाह हिट लिस्टमा परेका थिए । उनको अभिनय रहेको फिल्म ‘शत्रु गते’ उक्त लिस्टमा थियो ।

‘शत्रु गते’को नायक पल भए पनि यस हिट हुनुको क्रेडिट वरिष्ठ कलाकार हरिवंश आचार्यलाई गयो । फिल्ममा पनि हरिवंश र दीपकराज गिरी हाबी छन् ।

तर, पलले गत वर्ष बक्स अफिसमा करिअरकै ठूलो सफलता हात पारे । उनको फिल्म ‘आबाट आमा’ हिट भयो । यो फिल्म उक्त लिस्टको १२ नम्बरमा छ भने ग्रस कलेक्सन १३ करोड २० लाख गरेको छ ।

उनी सोलो शीर्ष भुमिकामा रहेको फिल्म सूचीमा परेको यो नै पहिलो पटक हो ।

अनमोल पनि सूचीमा

नायक अनमोल केसी टिनएजर्स अडिएन्स तान्ने नायकका रुपमा परिचित छन् । उनको फिल्म हेर्न हतपत फेमिली अडिएन्स आएको पाइदैन ।

‘नेपालमा फेमिली अडिएन्स नआएको फिल्म चल्दैन’ भन्ने भाष्य छ ।

तर, अनमोल यो पटक हिट लिस्टमा आए । गत वर्षको प्रदर्शनमा आएको उनको फिल्म ‘जेरी अन टप’ सूचीमा परेको हो । यसको व्यापार १२ करोड २८ लाख छ ।

३१ हिट फिल्मको सूची

१- पूर्णबहादुरको सारंगी : ४६ करोड ८७ लाख
२- कबड्डी ४ : २१ करोड ४० लाख
३- १२ गाउँ : १९ करोड ९२ लाख
४- परान : १७ करोड ७६ लाख
५- छक्कापञ्जा ४ : १७ करोड ५३ लाख
६- जारी : १७ करोड ४८ लाख
७- छक्कापञ्जा : १६ करोड १० लाख
८- महाजात्रा : १५ करोड ६७ लाख
९- छक्कापञ्जा ५ : १५ करोड २० लाख
१०- कोहिनुर : १४ करोड ७५ लाख
११- छक्कापञ्जा २ : १४ करोड ५१ लाख
१२- आबाट आमा : १३ करोड २० लाख
१३- शत्रु गते : १२ करोड ६५ लाख
१४- जेरी अन टप : १२ करोड २८ लाख
१५- ऊनको स्वीटर : १० करोड ६२ लाख
१६- कबड्डी कबड्डी : १० करोड ३५ लाख
१७- बोक्सीको घर : १० करोड १० लाख
१८- छ माया छपक्कै : ९ करोड ९२ लाख
१९- लालीबजार : ९ करोड ३१ लाख
२०- लुट २ : ९ करोड २१ लाख
२१- दिमाग खराब : ८ करोड ९८ लाख
२२- अञ्जीला : ८ करोड ८३ लाख
२३- परदेशी २ : ७ करोड ९२ लाख
२४- छक्कापञ्जा ३ : ७ करोड ८३ लाख
२५- प्रेमगीत ३ : ७ करोड ६३ लाख
२६- कबड्डी कबड्डी कबड्डी : ७ करोड ५९ लाख
२७- पूजार सार्की : ७ करोड ३८ लाख
२८- महापुरुष : ७ करोड ३५ लाख
२९- कबड्डी : ७ करोड ३४ लाख
३०- पशुपति प्रसाद २ भस्मे डन : ७ करोड ३२ लाख
३१- आगो : ७ करोड २० लाख