काठमाडौँ– राष्ट्रिय स्वतन्त्र पार्टी (रास्वपा) का नवनिर्वाचित पदाधिकारी र केन्द्रीय सदस्यहरूले आज पदको सपथ लिँदैछन् । महामन्त्री विपिन आचार्यका अनुसार बिहान ११ बजे पार्टी केन्द्रीय कार्यालय वनस्थलीमा सपथ ग्रहणको कार्यक्रम रहेको छ ।

यही असार ७ देखि १२ गतेसम्म चितवनको भरतपुरमा भएको पार्टीको पहिलो राष्ट्रिय महाधिवेशनले रवि लामिछानेको नेतृत्वमा ६ पदाधिकारी र ९९ केन्द्रीय सदस्य चयन गरेको थियो । सभापतिमा लामिछाने र उपसभापतिमा स्वर्णिम वाग्ले निर्विरोध निर्वाचित भएका थिए भने अन्य पदमा विद्युतीय मतदान भएको थियो ।

पार्टीको विधानमा १९ जना पदाधिकारी रहने व्यवस्था छ । अब बाँकी १० पदाधिकारी रविले मनोनित गर्न पाउनेछन् । १० जना पदाधिकारीमध्ये पार्टीलाई अत्यावश्यक चाहिने पार्टी प्रवक्ता र कोषाध्यक्षको जिम्मेवारी अहिलेसम्म कसैलाई दिइएको छैन । वरिष्ठ नेतामा वालेन्द्र शाह स्वतः मनोनीत हुने देखिन्छ ।