काठमाडौँ – इरान र इजरायलबीच जारी तनावका बीच कतारको राजधानी दोहामा कूटनीतिक दौडधुप तीव्र बनेको छ । कतारका प्रधानमन्त्री एवं विदेशमन्त्री शेख मोहम्मद बिन अब्दुलरहमान बिन जासिम अल थानीले अमेरिकी विशेष दूतहरू स्टिभ विटकफ र जारेड कुश्नरसँग दोहामा भेटवार्ता गरेका छन् ।

इरानी वार्ताकारहरू पनि यतिबेला दोहामै रहेका छन् । तर, अमेरिकी र इरानी पक्षबीच तत्काल कुनै प्रत्यक्ष वार्ताको कार्यतालिका नरहेको बताइएको छ । इरानले युद्धविराम र तनाव न्यूनीकरणका लागि आफ्ना सर्तमा दृढ अडान कायम राखेको छ ।

यसैबीच, संयुक्त राष्ट्रसंघका महासचिव एन्टोनियो गुटेरेसले प्यालेस्टाइनी शरणार्थीका लागि काम गर्ने राष्ट्रसंघीय नियोगमा देखिएको १०० मिलियन डलरको वित्तीय अभाव पूर्ति गर्न सदस्य राष्ट्रहरूलाई आग्रह गरेका छन् । कडा खर्च कटौती र मितव्ययिताका उपायहरू अपनाउँदा अपनाउँदै पनि यो संस्था अहिले बन्द हुने अवस्थामा पुगेको महासचिव गुटेरेसले बताएका छन् ।

महासचिव गुटेरेसले महासभाको विशेष बैठकलाई सम्बोधन गर्दै भने, “सदस्य राष्ट्रहरूको तत्काल आर्थिक सहयोग र समर्थन बिना यो नियोगले काम अगाडि बढाउन सक्ने अवस्था छैन ।” इजरायलले नियोगमाथि लगाएका आरोपहरू पछि संस्थाले व्यापक सुधारका कदम चालेको र आफ्ना नीतिहरू परिमार्जन गरेको समेत उनले स्पष्ट पारे ।

“अस्थिरताको यो युगमा एउटा स्थिरता कायम राख्ने शक्ति हो,” गुटेरेसले भने । उनले भ्रामक प्रचार, दुष्प्रचार, कानुनी अवरोध र कूटनीतिक उल्झन खडा गरेर नियोगलाई कमजोर बनाउन भइरहेका प्रयासको कडा शब्दमा निन्दा गरे ।

यो नियोगले गाजा, कब्जा गरिएको वेस्ट बैंक, लेबनान, जोर्डन र सिरियामा रहेका करिब २६ लाख प्यालेस्टाइनीहरूलाई खाद्यान्न सहायता, शिक्षा, स्वास्थ्य, सामाजिक सेवा र आश्रय प्रदान गर्दै आएको छ । इजरायलले उक्त नियोगले प्यालेस्टाइनी सशस्त्र समूहहरूलाई सहयोग गरेको आरोप लगाउँदै आए पनि अहिलेसम्म त्यसको सार्वजनिक रूपमा प्रमाणित हुने कुनै प्रमाण प्रस्तुत गर्न सकेको छैन । नियोगले इजरायलको यो आरोपलाई पूर्ण रूपमा अस्वीकार गर्दै आएको छ ।