काठमाडौं– नेपाली कांग्रेसका सभापति गगनकुमार थापाले जनताले दिएको म्यान्डेडअनुसार ठिक ढंगले आफ्नो जिम्मेवारी निर्वाह गर्न सरकारलाई सुझाव दिएका छन् । 

शुक्रबार काठमाडौंमा नेपाल ट्रेड युनियन कांग्रेसको राष्ट्रिय परिषद् उद्घाटन गर्दै सभापति थापाले सरकारको कामकारबाहीले देशलाई ठीक ढंगले अघि बढाउने नदेखिएको भन्दै म्यान्डेडअनुसार ठिक ढंगले आफ्नो जिम्मेवारी निर्वाह गर्न सरकारलाई सुझाव दिएका हुन् ।

उनले आफूहरू केही समय मौन रहेर मौनताको बीचमा सत्यको खोजी गर्ने प्रयासमा रहेपनि अव भने मौन व्रत तोड्नुपर्ने अवस्था आएको धारणा राखे । 

सभापति थापाले नदी किनारामा बस्दै आएका नागरिकलाई हटाउने र उनीहरूलाई उचित व्यवस्थापन गर्ने अधिकार र जिम्मा कानूनले दिएको उल्लेख गरे । 

कानुनको शासनको परिधिभित्र रहेर सरकारले सोच्दै गर्दा आफ्नो नागरिकसँग युद्ध अपराधी जस्तो व्यवहार गर्न नमिल्ने उनको भनाइ छ । उनले सरकार कानूनको बलमा मात्रै अघि बढ्न खोजेको धरै उदाहरण देखिएकाले यसले कसैलाई पनि ठिक ठाँउमा लिएर नजाने बताए । 

सभापति थापाले सरकारले अध्यादेश ल्याउन पाउन भएपनि त्यसका आधार तय गर्नुपर्नेमा जोड दिए । त्यस्तै भाद्र २४ गतेको घटनाको छानबिनका लागि सरकारले न्यायिक छानबिन आयोग बनाउने प्रतिबद्धता जनाए पनि पछि त्यसबाट पछि हटेको उनले बताए । 

सभापति थापाले श्रमिकहरूलाई एकताबद्ध हुन पाउने अधिकार संविधानले नै दिएको भन्दै कसैले चाहेर श्रमिकको अधिकार खोस्न नसक्ने स्पष्ट पारे । उनले प्रतिनिधिसभा निर्वाचनमा पार्टीले पराजय भोगेकोमा चिन्ता नभई कमीकमजोरी खोज्ने तर्फ लाग्नुपर्ने बताए ।