वासिङ्टन- अमेरिकी डोनाल्ड ट्रम्प प्रशासनले इरानविरुद्ध २८ फेब्रुअरीमा सुरू भएको सैन्य कारबाही अब समाप्त भएको जनाएको छ।

एनबीसी न्यूजसँग कुरा गर्दै एक अमेरिकी अधिकारीले कानुनी हिसाबले अब यसलाई ‘चलिरहेको युद्ध’ मान्न नमिल्ने बताएका छन्।

गत ७ अप्रिलदेखि दुवै पक्षबीच दुई हप्ते युद्धविराम लागू भएको थियो, जसलाई ट्रम्पले पछि लम्ब्याएका थिए। त्यसपछि अमेरिका र इरानबीच दोहोरो गोलीबारी भएको छैन।

रिपोर्ट अनुसार, अमेरिका र इजरायलले २८ फेब्रुअरीमा इरानमाथि आक्रमण सुरु गरेका थिए। त्यसको जवाफमा इरानले खाडी क्षेत्रमा रहेका अमेरिकी सहयोगीहरूलाई लक्षित गर्दै प्रतिक्रिया दिएको र होर्मुज स्ट्रेट बन्द गरेको थियो।

पछि ८ अप्रिलमा पाकिस्तानको मध्यस्थतामा युद्धविराम लागू भएको थियो। ११–१२ अप्रिलमा इस्लामाबादमा वार्ता भए पनि कुनै ठोस सम्झौता हुन सकेन।

युरोपेली संघले के भन्यो ?

युरोपेली संघकी विदेश नीति प्रमुख काया कालासले होर्मुज क्षेत्रमा बढ्दो तनाव अझै कम हुने संकेत नदेखिएको बताएकी छन्। उनले चेतावनी दिँदै यसले विश्व अर्थतन्त्रमा ठूलो असर पारिरहेको उल्लेख गरिन्।

उनले अहिले यस अवस्थाबाट रूसलाई फाइदा भइरहेको बताइन् । तेलको मूल्य बढिरहेकाले युद्धबीच फाइदाजति रूतिर गइरहेको उनले बताइन् । यसका साथै धेरै देशहरूमा हतियार आपूर्तिमा पनि ढिलाइ भइरहेको उनले बताइन् ।