काठमाडौं – बालेन र्‍याप ब्याटलबाट चर्चामा आए पनि कतिपय गीत खासै चर्चामा थिएनन् भन्ने कुरा पछिल्ला केही घटनाले प्रष्ट पारेको छ ।

पछिल्ला चार महिनामा उनको स्वरमा दुई गीत सार्वजनिक भए । राजनीतिको व्यस्त तालिकाका बीच उनले गीतहरू सार्वजनिक गरेका हुन् ।

प्रधानमन्त्रीका शपथ खानु अघिल्लो दिन बालेनले ‘जय महाकाली’ शीर्षकको गीत सार्वजनिक गरे ।

धेरैलाई यो गीत नयाँ लागेको छ । तर, यो ७ वर्षअघि सार्वजनिक भएको फ्लप गीत हो । जम्मा ६२ हजार भ्युज पाएको थियो ।

पहिला यस गीत बालेन एक्लैले स्वर दिएका थिए । अहिले भने कोरसमा स्वपनिल शर्माको स्वर छ । बिट नयाँ बनाइएको छ ।

यो गीतले ६ दिनमा युट्युबमा मात्रै झन्डै ५८ लाख भ्युज पाएको छ । यति भ्युजले नेपालको सन्दर्भमा धेरै जटिल मानिएका रकेर्ड ब्रेक भएका छन् ।

छिटो १ मिलियन भ्युज पुर्‍याएर यस गीतले रेकर्ड राखेको छ । यो गीतले ३ घण्टामा नै १० लाख भ्युज पाएको थियो ।

२४ घण्टामा सबैभन्दा बढी हेरिएको गीतको रेकर्ड पनि यसैले राखेको छ । यो गीतले दुर्गेश थापाको रेकर्ड तोडेको हो ।

दुर्गेशको गीत ‘जाने भए जाम माया’ले २४ घण्टमा १९ लाख भ्युज पाएको थियो । बालेनको गीत ‘जय महाकाली’ले २४ घण्टामा ३५ लाख भ्युज पाएको हो ।

बालेनको यो गीत सबैभन्दा छिटो ५० लाख भ्युज पाउने गीत बनेको छ । सार्वजनिक भएको तीन दिनमै यसले उक्त भ्युज पाएको हो ।

पहिला यो गीत सार्वजनिक हुँदा बालेन युवा पुस्तामा मात्रै चर्चित थिए । राजनीतिमा आएपछि उनी सबै उमेर समूहका व्यक्तिले चिन्ने नेता बने । यही चर्चाको रापतापमा गीत निकालेकाले भ्युजको ओइरो लागेको हो ।

धेरै दर्शकले यसलाई नयाँ गीत मानेका छन् । यसले गर्दा पनि उनी त्यति चर्चित र्‍यापर होइनन् भन्ने पुष्टि गरेको छ ।

बालेनको यसअघिको गीत ‘आम नेपाली बुवा’मा पनि यही कुरा लागू भएको थियो । आफ्ना सहयोगी अर्जुन घिमिरे पाँडेको फिल्म ‘झरीपछिको इन्द्रेणी’मा समावेश गर्ने रि–रेकर्ड गराएको उक्त गीतलाई धेरैले नयाँ मानेका थिए ।

अर्थात्, चर्चामा आएको व्यक्तिहरूले जस्तो गीत निकाले पनि चल्छ भन्ने संघर्षरत र्‍यापरहरूको भनाइ बालेनको हकमा लागू भएको पाइन्छ ।