काठमाडौं- इरानले अमेरिका र इजरायलसँग लामो समयसम्म युद्ध गर्न तयार रहेको जनाएको छ। विदेशमन्त्री अब्बास अराघचीले आवश्यक परे ६ महिनासम्म संघर्ष जारी राख्न सक्ने संकेत दिएका छन्।

अराघचीले इरानले लामो समयसम्म युद्ध लड्न पूर्ण तयारी गरिसकेको बताएका छन् । परिस्थिति अनुसार संघर्ष जारी रहने उनले बताएका छन्।

उनले देशको सुरक्षा र सार्वभौमिकता सर्वोपरि रहेको उल्लेख गर्दै त्यसको रक्षा गर्न आवश्यक सबै कदम चालिने स्पष्ट पारे।

स्थल आक्रमण भए तयार

विदेशमन्त्री अब्बास अराघचीले अमेरिकालाई कडा चेतावनी दिँदै स्थल आक्रमण भए इरान पूर्ण रूपमा तयार रहेको बताएका छन्। उनले भने, ‘हामी उनीहरूको प्रतीक्षामा छौँ।’

अराघचीले इरानलाई अमेरिकी स्थल आक्रमणको कुनै डर नरहेको बताउँदै जुनसुकै अवस्थाको सामना गर्न तयार रहेको बताएका छन्।

उनले भने, ‘इरान आफैं स्थल युद्ध चाहँदैन, तर यदि त्यस्तो अवस्था आएमा त्यसको उचित जवाफ दिन सक्षम छ।’

उनले अमेरिकालाई चेतावनी दिँदै यस्तो गल्ती महँगो पर्न सक्ने बताएका छन् । इरानले आफ्नो रक्षा गर्न राम्रोसँग जान्ने पनि उनले उल्लेख गरेका छन्।