काठमाडौँ – नेकपा (एमाले) संसदीय दलको बैठक आज बस्दैछ । बुधबारदेखि संसदको अधिवेशन सुरु हुने भएकोले आजको बैठकले संसदीय दलको नेता, प्रमुख सचेतक र सचेतकको टुंगो लगाउने सम्भावना छ ।

पार्टीका पूर्व उपाध्यक्ष एवं सांसद गुरु बरालका अनुसार बिहान ११ बजे पार्टी केन्द्रीय कार्यालय च्यासलमा बैठक बस्दैछ ।

एमालेका वरिष्ठ नेतामा उपाध्यक्ष रामबहादुर थापा ‘बादल’ संसदीय दलको नेता बन्ने चर्चा छ । युवा नेतामा भने इलामबाट निर्वाचित सुहाङ नेम्वाङको नाम चर्चामा छ । ताप्लेजुङबाट निर्वाचित एमाले युवा संघठनका अध्यक्षसमेत रहेका क्षितिज थेबेको नामसमेत चर्चामा छ । धनकुटाबाट प्रत्यक्ष जितेका राजेन्द्रकुमार राईसमेत चर्चामा छन् । प्रत्यक्षतर्फ एक जना पनि महिला विजयी नभएकाले समानुपातिकतर्फ विजयी पद्मा अर्यालको नामसमेत दलको नेताका रुपमा चर्चामा छ ।

संसदीय फाँटमा एमालेले संसदीय दलको नेता, उपनेता, प्रमुख सचेतक, सचेतक गरेर चार नेतालाई जिम्मेवारी दिनसक्छ ।

फागुन २१ गते भएको निर्वाचनमा एमालेले प्रत्यक्षतर्फ ९ र समानुपातिक तर्फ १६ सिट सहित २५ क्षेत्र जितेको छ ।

नेता बरालका अनुसार बैठकमा पार्टीका महासचिव शंकर पोखरेलले सांसदलाई पार्टीको नीति र संसदमा निर्वाह गर्नुपर्ने भूमिकाका बारेमा जानकारी गराउने छन् ।